【獨家】未適應圈中生活感迷失曾樂彤受壓狂搲頭甩髮

2021-06-14 11:56

曾樂彤最近推出EP《Inner Child》輯錄這兩年製作歌曲，她認為第二張唱片以成長做主題好適合。不過，她坦言仲未適應圈中生活，感覺不踏實好迷失，又給自己不少壓力，更自爆繼不自覺搲耳仔搞到損晒後，現在狂搲頭嚴重到搲損頭皮勁甩頭髮，她也擔心是情緒問題，但未打算睇醫生，只會搵方法減壓。撰文：杜淑霞攝影：張詠森髮型：Zap Tang 場地：Coffeelin

繼18年推出首張EP《#meme》後，曾樂彤剛推出《Inner Child》，她認為相當適合，「第1年出碟係新人嘅作品集咁，𠵱家入行3年幾，好似將啲歌又可以出一隻碟，咁啱睇番個歌list又真係幾啱成長為課題去做一件事。」她承認由學校跳入社會，還未適應這個成人世界，「唔會知自己幾時係盡咗力，永遠比你勤力嘅人大有人在，當我入咗社會覺得嗰個無力感係超大嘅，運氣之餘仲有大環境，好多嘢都唔可以估計到嘅時候，呢啲就要靠你執生能力，但呢啲係你讀書都讀唔到。」

有傷口未敢染髮

正因為這份無力感，入行3年多的曾樂彤未敢有太多目標，因自覺已給了自己太多無形壓力，更出現狂搲頭甩頭髮情況，「真係甩頭髮，經理人唔畀我搲頭髮，因為本身搲耳仔先，搲到耳窩個位長期發炎，髮型師唔畀我搲，我𠵱家完全冇事，因為我轉咗搲頭。我又唔係濕疹，純粹係一個習慣，係會搲到流晒血。我㩒電話經常性係咁，半夜喺廁所搲咗半個鐘九個字，搲到直情有聲，自己都覺得好過份。（鬼剃頭？）touch wood我未去到咁，我唔搲就唔會甩（頭髮），我好鍾意搲到有頭皮甩，所以都唔可以染頭髮，有傷口驚會入咗血。我都喺度諗自己有咩壓力！？我係驚唱歌，驚我pick up得唔夠快，好多嘢都冇乜信心，知道太緊張會壞事，以為說服到自己由佢啦！但其實我冇由佢囉！但可能（搲頭）只係壞習慣，或者改番搲番耳仔，哈哈！（去做心理諮詢？）我覺得好貴呀！自己對住塊鏡都識同自己傾偈，我覺得近啲開心啲人就得。」