死侍賴恩唔想再保護森姆積遜 《保鑣救殺手2》動作連場炸埋遊艇

2017年，美國動作喜劇《保鑣救殺手》（The Hitman's Bodyguard）全球大收1.76億美元（約13億港元）票房， 續集《保鑣救殺手2》（The Hitman's Wife's Bodyguard）將於6月17日在港上映！今次繼續由首集導演柏德烈侯治（Patrick Hughes）執導，上集兩位主角曾憑超級英雄電影系列《死侍》（Deadpool）成為荷里活巨星嘅賴恩尼諾斯（Ryan Reynolds），以及《復仇者聯盟》（The Avengers）系列嘅森姆積遜（Samuel L. Jackson）亦會回歸！

故事講述賴恩尼諾斯飾演嘅米高拜斯決定告別保鑣生涯，休假中撞到上集由森姆積遜飾演嘅殺手達利基奇的「欺詐女皇系」索爆老婆索妮亞，被迫再次做達利嘅保鑣！兩個人喺歐洲再次面對惡啃任務，仲突然要同由安東尼奧班達拉斯（Antonio Banderas）飾演嘅惡勢力癲佬巴巴多普羅斯對決，保鑣與殺手嘅善惡對立，一場離奇搞笑任務即將上演！

殺手老婆索妮亞繼續由莎瑪希恩飾演，佢喺今集有極重戲份，唔單止電影海報企正中間，從預告中亦可見佢參與大量動作場面，眼利嘅觀眾一定留意到英文戲名由上集《The Hitman's Bodyguard》變成《The Hitman's Wife's Bodyguard》，唔通今次要保護嘅其實係殺手達利嘅老婆索妮亞？

除咗舊有班底，今集仲搵嚟強勁卡士加盟，包括《蝙蝠俠》系列金像得主摩根費曼（Morgan Freeman）以及理查格蘭特（Richard E. Grant）等等。預告中不乏爆破、槍戰嘅刺激動作場面，同時有不絕的搞笑場口，成功舒緩緊張嘅任務情節。