頻道開設57日249萬訂閱 二宮和也大哂YouTube認証金銀獎牌
2021-06-03 14:30 
日本國民男團「嵐」休團至今已五個月，成員二宮和也繼續發展個人事業，為咗配合尊尼事務所進軍海外市場，早於4月連同三位尊尼事務所後輩開設YouTube頻道「Johnny的Channel」。昨日頻道上載影片「你掉的是這個銀盾牌還是這塊銀盾牌？」，二宮大哂終於收到由美國YouTube總部送嚟嘅兩塊獎牌。分別係YouTuber訂閱人數破10萬就會獲得嘅「白銀創作者獎」銀牌，以及破百萬訂閱人數嘅「黃金創作者獎」金牌，其實Channel成立至今57日訂閱人數249萬，絕對超額完成，認真厲害！
影片中二宮約咗Channel其餘3位後輩想畀個驚喜大家，但搞笑話要享受優越感所以自己拆獎牌先。二宮抱住兩塊獎牌向鏡頭展示，左右搖吓搖吓咁表情勁得戚，多謝Fans對佢哋嘅支持！之後就隨意放獎牌喺地下，想知3位後輩睇到有乜反應。
3個後輩成日被二宮整蠱搞到嚇怕咗，所以入到房先注意到角落神秘嘅保險箱，隨即大嗌搞乜整到生化危機咁，直到二宮提醒之下3個先嚇親，開心到跑去拎起地下獎牌！KTU-TUN成員中丸雄一嚇到傻咗，除咗問有無銅獎牌，更誤信Sexy Zone成員菊池風磨嘅嘅大話，以為獎牌係純金製作！二宮表示佢哋係第五個由事務所開設的YouTube Channel得到獎牌，後輩們聽到之後話要將獎牌掛喺房展示，好威水咁話！Hey! Say! JUMP成員山田涼介講感受，仲特登多謝二宮喺早前慶生影片畀個機會佢同前輩中丸交流，雖然兩人唔係好熟，但會繼續努力打好關係！
關鍵字
最新回應