拍《逆天》壓力大到瞓唔着　趙璧渝演技獲讚Job量急增

現年32歲的趙璧渝（Osanna）近日憑熱播劇《逆天奇案》中，飾演陳展鵬下屬「妹頭」一角而人氣急升，談到此次是入行8年以來最多戲份，為拍攝跟悍匪槍戰的鏡頭，她更不眠不休通宵排練開槍動作及表情，Osanna說：「第一次有咁多屬於自己嘅鏡頭同對白，拍攝期間心理壓力好大，成日都瞓唔着，好緊張，因為想演得好啲，好好把握今次機會。」

其中一幕「洗腦」戲，Osanna的表現更令人眼前一亮，公司不少同事亦為她打氣，她興奮謂：「有次喺化妝間撞見『大小姐』林淑敏，我哋之前因合作處境劇《愛‧回家之開心速遞》而認識，佢話有睇套劇，仲對我講咗好多鼓勵說話，真係好感激佢，除咗公司同事外，有啲圈外朋友睇咗套人劇之後，都有Send訊息嚟打氣。」《逆》劇也帶挈Osanna工作量急增，她說：「出劇係會增加咗搵錢機會，最近都有啲宣傳片、廣告傾吓，睇吓有冇合作機會。」

說到出道以來收入不多，但多年來仍獲媽咪支持，在單親家庭長大的Osanna說：「媽咪好忙，平時好少追劇，不過佢今次為咗我都煲劇，自己好愧疚咁多年都畀唔到家用媽媽，仲要媽咪擔心我夠唔夠錢用。」