撐港姐卸任前禁拍劇　劉倩婷盼新血多參與慈善活動

09年港姐冠軍劉倩婷（Sandy）昨晚偕歷屆港姐冠軍，齊齊為TVB節目《開心大綜藝》擔任嘉賓，此次也是她產後首度亮相公開活動。穿上黑色貼身Off shoulder晚裝的Sandy，雖然剛於3月誕下二女李紳希（Felicia），但身形也未見走樣，手腳和腰部仍非常纖幼，她卻自嘲未修身就出來見大家，自覺也很勇敢，並謂：「我會開始努力減肥，而家距離我生BB前仲差十幾磅。」

提到曾志偉回巢後，為新一屆港姐競選訂立新規矩，禁止港姐當選一年內拍劇，並以擔任親善大使及服務社會為目標，從而提升港姐形象．對此，Sandy也表示支持：「我嗰年都唔可以（拍劇），一定要完成所有親善，同埋慈善工作，當年我去到倫敦及南非世界小姐，以及到波蘭做親善，離開咗香港大約三個月時間。」作為慧妍雅集前會長，她也認為港姐其中一個最大使命就是慈善工作，「我哋都希望多啲近年香港小姐可以參與到我哋嘅慈善活動。」

談到慧姸雅集將踏入40周年，由於疫情關係，該會已停辦慈善晚會兩年，Sandy說：「呢個都係我哋最主要嘅籌款活動，所以希望嚟緊40周年可以大家齊心合力，希望疫情逐漸轉好，籌多啲善款，回饋社會！（嚟緊有咩慈善活動？）相信會計劃一下其他籌款活動，嚟緊8月新一屆會長上任後就會計劃。」又稱大家都會多關注受疫情影響的市民。

至於會否擔任港姐一對一訓練導師？Sandy指要視乎能否配合湊女的時間，「畢竟細女只有兩個月，都需要多陪伴佢，如果時間配合到也會考慮，但我覺得最重要係能夠將佳麗最好的一面展現出嚟，如自信、內涵，讓佢哋盡量享受當中過程。勝敗不是重點，也部份靠運氣。但當中能夠學會的，就是會終身受用。」她呼籲更多有夢想、美貌與智慧並重的女仔，可勇敢參與港姐，踏出人生重要的一步。