【MIRROR首場Show】Do姐6號現身撐場　吳肇軒擺烏龍早一日到場　

人氣男團MIRROR假九展舉行一連六場的《MIRROR “ONE & ALL” LIVE 2021》今晚展開，由於下午5時在現場公開演唱會紀念品，一眾「鏡粉（MIRROR粉絲稱號）」都提早到場掃貨，不過期間卻發生了一段插曲，事緣售賣處在正式開騷前落閘收檔，鏡粉見狀隨即鼓譟，大感不滿，要求繼續開檔，認為演出期間仍有Fans想買紀念品，不應太早落閘。

另一則趣聞，話說吳肇軒今日都現身九展「睇騷」，未料到場取門票才得知自己擺烏龍，一直以為自己睇「6號頭場」的他，原來獲大會安排的是7號場次門票！事後，吳肇軒也在社交網自爆呢單瘀事，並自封「屯門烏龍王」，他寫道：「我唔知係咪我當初聽錯，但係我愛Frankie。我聽日再嚟支持你。MIRROR演唱會大成功。#現場同我影咗相嘅朋友仔 #我知你哋睇好多場 #聽日再影過」

至於有幸睇到今晚頭場的，有ERROR成員肥仔、阿Dee和保錡，3人入場睇騷時更吸引全場觀眾尖叫，大批Fans更興奮上前「集郵」，他們亦來者不拒。見到MIRROR經理人花姐（黃慧君）坐上控制台時，全場又再起哄，花姐即向觀眾揮手，儼如「女皇」出巡。其餘來捧MIRROR場的藝人，包括鄭裕玲（Do姐）、RubberBand主音6號、Stanley的女友Alina（李炘頤）、導演黃修平及莊文強等。