【獨家】靠41吋逆天長腿撐住 前Dusty Bottle主音Kerryta單飛出歌再戰樂壇
2021-05-06 08:45 
新冠肺炎疫情下，演藝界等多個行業大受影響，尤其樂隊及組合有錢要齊齊分，就更加難捱。成立咗兩年嘅5人樂隊Dusty Bottle，去年10月出完歌曲《Paradise》後決定分道揚鑣，各自出發。小休幾個月後，環球唱片為主音Kerryta以個人姿態單飛再出道，首支個人作品《心野》將於明天(7日)面世。Kerryta有得留低，除咗擁有一把磁性嘅聲線，能展現性感女人味外，仲有一條41吋逆天長腿，可以撐得住種種難關，相當吸睛。
《心野》以Neo Soul風格為骨幹，能突出Kerryta性感女人味嘅特質：「當收到demo時就畀歌曲嘅節奏感及旋律所吸引。始終係首支個人主打歌，感覺既新奇又興奮。」提到歌詞內容以女性角度出發，講出喺愛情關係中由女性做主導，對於「女追男」，Kerryta表示支持：「雖然我未試過女追男，但女性主動爭取自己鍾意嘅事有乜唔妥？我覺得女性可以有更多主導自己內心想法嘅權利，現今社會女性唔會忌諱表達自己嘅想法，可以勇於嘗試新事物，男仔甚至可以化身drag queen，去化妝、戴假髮，好自信咁展現自我。」
講到有吸睛長腿，Kerryta信心滿滿說：「我168cm高，對腳41吋，呢個身形比例腿算係長嘅，不過覺得自己可以再高啲，170cm就滿意喇！」
關鍵字
最新回應