【獨家】余潔滢想同廖子妤玩SheShe戀　徐頴堃拍網劇身兼三職

徐少強和雪梨所生的女兒徐頴堃（Erica）首次為網劇《我在CoverDog的日子》擔任編劇、副導演及PA，並邀得同門余潔滢（Zoe）演出「惡經理」一角。常說喜劇最考演技，CoverDog一班初哥卻越級挑戰，Erica說：「我覺得疫情下寫啲得意、開心嘢，大家喺屋企都會睇得開心，成個團隊亦好有心做好件事，多謝 Zoe姐，令件事更好睇。」為Erica獻出喜劇第一次的Zoe演上癮，更盼開第二季與好友廖子妤演SheShe。採訪：黎寶倫　服務：iBLUES　場地：CoverDog Production Ltd

面對一班「騎呢」下屬，劇中要經常打人的余潔滢說：「之前都做過惡嘅角色，但喜劇係另一個節奏，自己都係試吓，最難係忍笑，好辛苦。（私下搞笑？）正經多，雖然我天馬行空，但絕對唔係一個搞笑嘅人，平時比較Cool，對住識好耐嘅人先會講多啲嘢、搞爛Gag，啲人就會勸我唔好再講嘢，哈哈。（演番自己？）係，但再惡啲，我平時唔會打人。」Erica表示：「Zoe本身好斯文，只係覺得如果有個反差，一個靚女嚟返工，突然郁手打人，我覺得幾得意。」

同好友錫錫冇問題
問為何不參與一角？Erica笑稱冇諗到，「可能第二季擺自己落去，但好似好奇怪、好Hard Sell咁，同埋幕後又少一個人！其實度劇本時向導演即興演一次都滿足咗我嘅戲癮。」雖然身兼三職甚辛苦，但她認為今次經驗能助自己演戲，更全力支持開拍《我》劇第二季。那麼下次想跟誰合作？Zoe說︰「我好想同廖子妤合作，佢同CoverDog都Jam過，佢喺度應該好好玩。（演SheShe？）好喎。」仲話Kiss冇問題，因為Friend更加唔尷尬。