【我真係偶像】髮型疑似剪衰咗 Edan硬推Barcode頭三大好處

MIRROR成員Edan（呂爵安）昨晚在社交網大晒自己的Barcode頭，更指可以「幫各位男士去build up自己嘅形象」。Edan先Hard sell新髮型似一把遮，「男人最緊要就係要夠MAN夠威猛，要保護到身邊嘅人。哩（呢）個髮型就係特登設計成一把傘嘅形狀，象徵住你係擁有遮風擋雨嘅能力，女士們見到呢個頭，一定會頓時安全感十足。」

Edan繼續口水佬上身：「如果你以為呢個頭淨係象徵住一把遮，咁你就錯了。認真啲望一望，其實佢仲係一個屋頂嘅形狀，呢個屋頂象徵住 — HOME（家）。所以擁有哩（呢）個頭嘅男人肯定好有家庭觀念，絕對比到女士們可靠嘅感覺。」就連頭頂幾條呆毛都有意思，「頭頂中心上面嘅毛毛，代表哩（呢）個人嘅想像力，係好似噴水池一樣，創意如泉湧。所以，剪咗呢個頭嘅男士肯定可以keep住比好多新鮮感對方。」

出盡奶力嘅Edan喺Hashtag呼籲粉絲「快啲tag你地嘅男朋友剪」，又指「我真係偶像」以挽救形象。不過MIRROR隊友一於笑咗先，Anson Lo（盧瀚霆）Mean爆表示「好過你平時個頭好多」；Jeremy（李駿傑）就笑Edan是「河童安」。連其髮型師隔住口罩都忍唔到笑意，Edan膠味男神代表作似乎又多一單！