【得來不易】幾十人聚集綵排好興奮 RubberBand全員檢測安心開Show

《RubberBand Ciao 2021》音樂會將於4月3至6日假紅館舉行，樂隊成員近日正忙於為音樂會綵排，期間亦趕工完成新歌《Ciao》。個唱加入了雷柏熹爵士大樂團及無伴奏組合AMuiXis一同演出，日前經過首次同場綵排後，RubberBand眾成員都十分興奮，阿正表示：「聽到Big Band玩返我哋嘅歌，當中有新Arrangement（編曲）都幾感動。」

阿偉看到眾人聚在一起，也不禁說：「加埋都幾十人，排練室已經好大但都有逼嘅感覺，但好開心，全部人一齊響起音樂，自己都好感動。」由於今次參與音樂會的人數眾多，所以大會在綵排期間的防疫功夫亦做到足。泥鯭說：「我哋好乖做晒檢測，好Safe先一齊練歌，同埋排練時樂手都間開晒，又唔俾外人探訪。喺疫情下大家都盡量保持身體健康，等大家可以如期享受個Show，我都幻想緊30幾個樂手喺台上嗰個畫面，肯定好正！」

為了今次音樂會，RubberBand特別創作了新歌《Ciao》，但因為忙於綵排而未能趕及開Show前灌錄歌曲派台，6號說：「因為橫跨咗兩星期應付一系列嘅綵排，歌詞又遲咗起貨，所以要喺咁密嘅綵排中再抽兩至三日錄音的確好難；大家又錫住我把聲，冇特別要求生產首歌出嚟，所以我哋諗到先拍片段，早啲俾大家聽下隻歌，做完Show再錄歌，希望工作人員可以趕及Show前剪好俾大家睇。」