【維港會】打復必泰後口乾尿急 黃傑龍憂歐洲禁運：趁有嗰陣打

稻苗學會會長黃傑龍在社交網站表示，今日已經接種第一針復必泰（BioNTech）新冠病毒疫苗。他指感覺身體無大礙，只是口乾以及尿急。

他出發前往中山紀念公園體育館社區疫苗接種中心前，食了一粒益生菌以及維他命為免疫系統做好準備。

入場之前好嚴格檢查有否用安心出行或者認真填寫資料，然後所有參加者都要出示預約短訊。 然後上到2樓打針場地之前要用酒精搓手液消毒，跟住就要出示身分證，然後去講解區。

然後有一位醫護人員好細心每個人問好多問題，問及到血壓是否正常，他父親即話：「正常！ 淨係有啲砸界」醫護人員就緊張問：「砸界即係點？ 」然後他父親叫他拿出手機來：「我俾啲相你睇啦，影晒！」

醫護人員轉嚟問黃傑龍父親是否控制好，睇完啲相話：「仲好過我啦啲血壓」。 黃傑龍發覺現場所見超過60%是洋人，應該與場地有關。 然後很快就可以打針了。

黃傑龍透露，父親急不及待脫下恤衫，護士説：「唔使咁急！ 」 打針之前又要重新問一次，前後最少問了兩次確認市民知道打的是「復必泰」。 父親擔心正在食薄血丸於是問可否皮下注射，護士即刻答：「今日我哋全部都係打肌肉，冇其他選擇」，黃傑龍笑言「我覺得佢意思係你估你係袁國勇呀 」。

當輪到黃傑龍時，他形容「感覺上比平時打流感疫苗快好多同埋好似冇乜嘢打咗入身體，原來姑娘話只係打0.3毫升，平時啲疫苗應該最少1毫升，所以打嘅時候基本係唔痛」。

他利用智能手環實時檢測心跳、血氧含量同埋壓力指數，「我發覺準備進入會場之前心跳加快左，應該係緊張，壓力指數又出發前48去到打針前63」。

黃傑龍指，自小身體好差，8歲之前幾乎每個月都要看醫生。 成年後都好容易傷風感冒，一年總會有三、四次。年年都打流感針。過去一年是看得最少醫生的一年。「由於全年帶住口罩，而且幾乎冇約個朋友出街，晚晚返屋企食飯，基本上冇病過。 但係心理上我總係戰戰兢兢，成日擔心」。

他自言是一個好理智的人，選擇打疫苗其中一個重要的計算就是：「打，我會擔心兩日，疑神疑鬼；唔打，我會長期擔心，已經擔心左一年可能再要擔心多兩年。」 他稱，作為一個事事計算的生意人、工程師，認為「好處多於風險」。 所以他心理及知識準備，完全接受了已知不適包括發燒、疲倦、骨痛，特別是第二針聽聞會好像重感冒2日，「都幾辛苦，但係充分接受咗呢啲副作用，其實係代表身體已經開始有反應製造抗體中，我接受」。

他又透露，選擇打BioNTech，是因為這款疫苗在德國生產，暫時香港存貨有134萬劑，只夠65萬人用。 早前意大利已經運用歐洲疫苗出口法禁止疫苗出口到澳洲，目前香港與歐美關係欠佳，加上英國阿斯利康疫苗很多歐洲國家暫停使用，對BioNTech的需求急增，「如果萬一禁止出口香港，遲啲未必有得揀BioNTech。當然疫苗香港一定會充足的，萬一真係歐美禁止疫苗出口到香港，國家都一定會畀國藥、科興的，但係既然我想打BioNTech就真係寧願早啲趁有嗰陣時打咗佢」。

不過他溫馨提示，「當然疫苗係打入自己身體成為自己一部份，打唔打同埋打邊隻真係要自己諗清楚，千祈唔好有壓力」。