【維港會】反駁家長覺得網課好嘆 老師:聽到白逗人工真係難過

不少家長對於學校仍然未全面復課大有牢騷，有中學教師網上討論區「親子王國」發文反駁，指準備網課的功夫多、花時間，聽到家長一味埋怨「成日開口埋口話老師嘆慣，白逗人工，對於真心為學生付出的老師，聽到真係非常難過。」

發文者任教第二組別中學的中一、中四、中六班級，老師指中四五每日上課，然後中一至三輪住上課，她表示每日早上8時至下午1時要進行實體課及網課，下午再幫高年級補課及開會，「網課準備比實體課更多！教咗咁多年，我合埋眼都背到課本內容，但上網課，為咗令學生更有興趣同專注，我哋要諗好多活動，舉列整個Kahoot, 玩15分鐘，但準備功夫隨時一兩個鐘，仲要將好多教材電子化，等學生睇得更容易，依啲全部係心機時間！」

老師又指，學生每日網上交功課，「我就起ipad開來改，啲學生又scan得衰，有時好朦、有時cut咁啲字，我比收到實體功課用多起碼一倍時間批改。」她又透露「以前學生唔明我可以留佢起度教，而家隔山打牛，我甚至就住批改的作文，每份拍片比意見再send返畀學生，依啲唔係時間心機？」

她又表明並非拒絕檢測，學校沒有問過老師的意願，身邊所有教職員都願意檢測，希望盡快復課。她批判，「有人立心不良，想分化老師同家長，成日開口埋口話老師嘆慣，白逗人工，對於真心為學生付出的老師，聽到真係非常難過。」

她自言有2個小朋友，都好希望能課，所以完全明白家長的訴求，「但日日起度怨，對你小朋友有幫助嗎？」

有網民質疑，「你唔覺得你啲說話前後矛盾？既然全部都願意做，點解冇做？有人話唔好做呀？你哋唔識同校長反應嘅咩？」，她於是解釋，「一間24班的中學，除左大約60名老師，仲有書記、工友、lab tech接近100個職員，全面檢測係包括每一個職位，只要有一個人唔願意，都冇辦法全面復課。但我學校個情況係，有老師建議全面檢測，但學校無動於衷」。

有家長指，「是否復課，復課條件等，應該由教育局決定，而唔係將個波踢俾學校。」、「明白！的而且確某些老師在抗疫期間工作量比以前更多。辛苦晒！」

不過有家長抱怨，「唔係個個老師都咁勤力盡責架，以我女中學為例，網上功課從來唔改，係upload 答案上classroom ，學生自己對架」、「我仔嗰間完全冇教嘢，工作紙都唔改，叫佢地上堂對！」、「啲人講到老師zoom 咁多嘢做咁辛苦，但都唔肯去做檢測，真係唔知以為去檢測仲難過取西經呀」

帖文轉載自「親子王國」《中學老師的抗疫心聲》