【獨家】化身議員落區拉票勁高危　任賢齊冇罩開工西貢周圍走

新冠肺炎禍害甚深，UA戲院也不敵疫情宣佈全線結業，香港電影工作者總會會長田啟文直言，擔心「骨牌效應」致本土製作減少！去年底一連接拍兩部電影《大Project》和《失衡兇間：唐樓》的任賢齊（小齊）算係好好彩，近日再為新片《邊緣行者》擔正，不過疫情下冇工開又愁，有工開又驚「中招」！日前，小齊化身「議員候選人」到西貢市中心取景，脫下口罩的他帶住「助選團」穿梭小巷再移師天后廟拉票，而全部臨時演員均沒戴口罩，認真高危！採訪：譚壹致

日前下午5時半，《頭條日報》記者發現任賢齊和方中信，西裝骨骨現身西貢天后廟開工。當日，飾演1號候選人駱志明的小齊拍攝一場落區拉票的戲份，雖然一班工作人員都乖乖戴罩，但現場臨時演員人數眾多，目測約廿多人，全部均沒有戴口罩。本來跟方中信企埋一邊吹水的小齊，一聽到導演嗌埋位，即回到「助選團」之中補妝作準備；正式Roll機後，其身後的老臨落力搖旗吶喊，小齊更獲「粉絲」送花以示支持。最終他亦順利一Take過，一Cut機即戴上口罩離開。

真假粉絲齊叫
其實於較早時分，小齊已在區內被街坊「野生捕獲」，該短片於網上流出。當時他帶住「助選團」走到小巷派發印有改善民生及服務港人的宣傳單張，其間多名扮演「支持者」的老臨相繼湧出，並興奮包圍他；隨後，在旁舉機拍攝的「真．粉絲」也入戲大叫：「我哋支持你呀！」專業的小齊聽到即交戲，向對方揮手道謝，場面搞笑！