【維港會】「驚蟄」電子打小人受熱捧 可WhatsApp落單全程錄影

昨日係廿四節氣中嘅「驚蟄」，唔少市民到銅鑼灣鵝頸橋下光顧「拜神婆」，祈求「打小人」後能諸事順利。而現今世代講求網上化，電子打小人都有一定捧場客，透過WhatsApp落單都得。

有「拜神婆」講，近年愈嚟愈多內地客人透過微信傳照片，畀佢哋「打小人」，並以電子支付過數，簡單方便，而自己就會直播或錄播「打小人」過程畀客人。至於本地客人若喺「驚蟄」正日唔得閒，都會用WhatsApp落單。

有台灣拍賣網站更出現一項代客打小人服務，索價八百五十元新台幣，即約二百四十港元，都售出四十次。賣方話會根據客人提供嘅資料，由法師開壇「打小人」，亦會全程錄影。遊客喺疫情下無得嚟香港，o依個都不失為一個方法去抒發鬱結，趕走小人。

鵝頸橋昨日香火鼎盛，午飯時間，十幾檔「拜神婆」都排長龍，顧客都樂意畀五十元「打小人」，「打你個小人頭，打到你有氣冇掟唞」此起彼落。有人希望「打走個病毒」；有年輕女顧客不諱言「打小人」嘅對象係前男友。