【維港會】今日驚蟄打小人 港人冀打走新冠病毒

2021-03-05 07:45
今日驚蟄打小人。
今日驚蟄打小人。

今日驚蟄,係農曆二十四節氣嘅第三個節氣,灣仔鵝頸橋又會熱鬧起嚟,啪、啪、啪,打小人之聲四起。喺鵝頸橋底嘅打小人持牌人紅姑話,近期有人嚟要求打新冠肺炎病毒,希望用拖鞋底打走呢隻衰嘢,令香港人嘅正常生活快啲回復正常喎。人同此心,唔該紅姑大力啲打落去。

有多年打小人經驗嘅紅姑話,以往多數係女士嚟幫襯打小人,多數涉及感情事,要求打老公嘅小三,但近一、兩年經濟唔好,多咗人要求打小人、保就業,即係想公司裏面啲小人絕跡,令自身工作安穩啲。近排最新嘅打小人目標,就係新冠肺炎病毒嘞,有人專程嚟要求紅姑狠狠咁打隻病毒,求打走佢,香港經濟快啲好番,世界回復平靜,小妹都希望係咁就好啦。

講到生意,紅姑話過去一年幾無咗遊客,生意淡薄,平日甚至「食蛋」,但驚蟄係旺日,佢預咗今日打小人打到通宵。


農曆驚蟄,意味春天時節開始,天氣將會明顯變暖。天文台就預測,今日大致多雲,有幾陣雨,稍後有薄霧,氣溫介乎二十度至二十四度。

今日驚蟄打小人,港人最想打走嘅係新冠肺炎病毒。
今日驚蟄打小人,港人最想打走嘅係新冠肺炎病毒。

關鍵字

最新回應

關鍵字

熱門文章