前空姐「阿Tsar」爆靈異傳聞 華仔星爺拍《整蠱專家》撞鬼以後唔敢再合作
2021-03-02 08:30 
前空姐「阿Tsar」早前開YouTube Channel「Smart Travel」轉型做YouTuber，大爆娛樂八卦史，包括十大明星「好客、西客」、「富豪飯局」、「電視台高層搞淫亂全男班船P」等，大受網民歡迎，剝到一地花生。昨晚她再驚爆發生喺劉德華及周星馳身上嘅靈異傳聞，呢個傳聞近年傳到繪聲繪影，相當驚嚇！
華仔接受傳媒訪問時曾話過視星爺係偶像，可惜星爺同華仔自91年拍完電影《整蠱專家》再冇合作過，阿Tsar話，傳聞同靈異事件有關。話說當時兩人凌晨喺外景場地等埋位拍《整蠱專家》，星爺等到有啲肚餓，見遠處有個10幾歲嘅後生仔，星爺就揚手叫他過來代勞買宵夜。年輕人自稱係星爺影迷，滿心歡喜樂於效勞，仲話能為偶像效力經已好開心喇！唔使畀錢。此際華仔途經，星爺叫華仔搭單買埋。
之後兩人接過宵夜，連聲多謝年青人，年青人亦告功成身退。突然華仔發現櫈邊有份報紙，順手執起打開，一睇成個人嚇到彈起，醒晒話：「唔係咁整蠱我呀？」原來喺片場見到嘅年青人，喺噚日一宗致命交通意外被車撞死！之後華仔搵嚟大師為兩人占卜，大師勸兩人唔好再合作，否則對兩人不利，但究竟撞鬼傳聞係真定假？有待向當事人查證。但曾係周星馳所屬嘅星輝公司負責人之一嘅田啟文(田雞)就爆過星爺每次拍戲要過夜時，最怕就係一個人瞓酒店，所以拉他同房瞓客廳，而且唔准他熄燈。
最新回應