【獨家】7個人分4枱歎中菜慶功　Dear Jane食羊腩煲如食Buffet

2021-01-28 19:00

疫情下市道唔好，但樂隊Dear Jane（DJ）都仲有好多Job，還於去年底推出專輯《Limerence》，結果橫掃各大樂壇頒獎禮，連YouTube香港的「2020年度十大熱門音樂影片」亦有兩首MV上榜撼贏天團BTS，認真威水！大豐收的DJ早前出席完頒獎禮後跟同事去又一城食點心、羊腩煲等慶功，臨走再嘆番支甜筒，平有平食最緊要開心。採訪：譚壹致

因為限聚令關係，香港人出街食飯只要多個兩個人都要分枱坐，冧莊叱咤樂壇組合金獎的Dear Jane也不例外。日前下午4時許，DJ同3位同事去又一城食Lunch慶功時，4加3係7，當然要「拆夥」分4張枱坐。由於7個人有一個凸咗出嚟，低音結他手Jackal（伍漢邦）好抵得諗，選擇一個人坐，其餘3位成員就各自同1位同事坐；一坐定，結他手Howie（翁厚樑）掛住吹水，主音Tim（黃天翱）和鼓手Nice（黎俊華）兩枱專心揀嘢食，冇嘢做的Jackal就拎住張消毒濕紙巾抹足成分鐘。

食完羊腩再食雪糕
最後大家叫咗啲點心、湯麵和一個$496的3人份「藥膳肉骨茶羊腩煲」Share食，食物嚟到分別散落4張枱，搞到7個人好似食Buffet咁，不斷企起身再拎住個碗逐張枱夾餸。睇翻Openrice介紹，呢間餐廳人均消費都係200蚊，慶功嚟講都真係抵到爛！眾人食飽坐到6點禁堂食令前先離開，隨後他們又陪Tim去Häagen-Dazs買雪糕食，Tim接過支甜筒即拉低口罩，一邊食一邊落樓離開。