【維港會】質疑唔靠父母亦可上車 網民批年輕人好高騖遠唔肯捱苦

香港樓價長年高企難以負擔，有網民發文，指「唔靠父母好難上車 ?想問有樓網友係唔係靠父母上車 ?」。結果引來網民激烈爭議，批鬥年輕人不切實際。

有網民稱，「我冇靠父母呀，不過我覺得如果肯住遠啲住細啲，無話上唔到車架，我識啲後生個個要住新樓，咁無計架喎…咁高要求，你話唔靠父母點上車…我父母就係捱生捱死先有層樓嗰種。不過依家啲人唔會明，只會話食少餐日本菜去少次旅行亦唔代表會買到樓」

其他網民順勢指責年輕人好高騖遠，「仲要交通方便，住屯門話屯門公路塞車返唔到工，住元朗又嫌要搭港鐵乜乜乜」、「都唔好話大西北﹐就算市區樓﹐只要唔係MTR上蓋附近嘅就唔考慮。(要轉車先到MTR嘅更加唔會諗)。所以有時啲人話啲樓價係咁升﹐佢儲極都唔夠樓價升得快﹐其實有時真係只要退一步就可以上到車。」、「唔好咁多要求，又要巿區，又要新樓，又話要有會所，仲唔可以細，點會搵唔到， 3百多萬嘅樓一定有」

其他網民認為客觀條件已經比早年困難，不應同日而語，「無靠父母 上車N年前同宜家比 好難比，以前搵幾千，買幾十萬樓，畀一成就上咗。」、「又咁講，2018年前買樓的，唔好自high 講到自己好本事。幾年變化，天同地！」、「係好難，首先你要揾倒另一半係有心同你成家立室的，然後要兩個人都月入起碼三萬以上，再者要兩個都鍾意儲錢，咁先有機會完全靠自己上車而層樓又不至太差location果隻」。