呻做藝人難覓另一半 關智斌自爆異地戀最開心坐電車

關智斌（Kenny）早前為阮小儀主持的香港開電視節目《小儀與13型男》擔任嘉賓，節目中他與小儀到主題公園約會，除了手拖手玩旋轉木馬、過山車等，二人更浪漫地嘴對嘴一起食冬甩，當與Kenny鼻尖相碰時，小儀仲即興奮大叫：「私底下好少有呢種感覺，原來係咁得意嘅，掂鼻哥都有一種挑逗感覺。」談到揀選異性朋友，Kenny透露首選是有潔癖，「有咩類型女性會吸引到我？要教到我嘢，未必要喺邊方面叻啲，但要有共同進步嘅目標，喺社會唔做嘢、唔認真工作，好容易冇咗生活。」問到心目中的女神是怎樣？他表示要有知性美，例如孫燕姿、莫文蔚等。

小儀認為在圈中要找到另一半較吃力，Kenny表示認同：「自己圈子好難有戀愛發生，喺第二個地方可能容易啲、冇咁多包袱，老實講，做藝人係會有少少光環，當出到街啲人見到你嘅時候會『嘩，小儀呀！』但當同一個人有關係時，呢個濾鏡某程度上阻礙咗真誠發展，所以去第二個地方，濾鏡冇咁重，嘗試異地發展吓（感情）可能好啲。」他又自爆試過異地戀，感覺仲好開心，「香港比較少坐公共交通工具，喺外地時兩個人一齊坐公共交通工具，坐電車周圍去，好開心。」此外，曾跟心中「男神」約會的小儀，就坦言感覺並不好受，「記得當時個心係卜卜咁跳、好開心，但諗番轉頭整個約會都唔係好自己、好作狀，原來同幻想100分嘅男仔約會，係會冇咗真正嘅自己。」