夾埋87歲上《認哥》大晒舞技 Rain 朴軫永齊慶幸囡囡唔似自己

2021-01-04 18:15

十分老友的Rain和朴軫永上《認識的哥哥》宣傳新歌《Switch To Me》。

出道18年的韓流天王Rain，17年與女星金泰希結婚並誕下兩名囡囡，近年積極與不同單位合作出歌，例如去年透過綜藝《玩甚麼好呢》和劉在錫、李孝利組成企劃團體SSAK3，又和Zico合作歌曲《Summer Hate》。雖然Rain早於07年離開JYP娛樂，不過依然與社長兼歌手朴軫永（JYP）好Friend，二人近日更合作出新歌《Switch To Me》。

這個歷代級的雙人組合，日前齊齊作客綜藝節目《認識的哥哥》，更即場表演《Switch To Me》的舞蹈，Rain和朴軫永出道多年駕輕就熟，完全睇唔出二人分別已經38歲及49歲！

兩位樂壇重量級人物上節目又點止表演咁簡單，在節目中亦大談不少趣事，包括湊女經。Rain先後在17及19年生下兩位囡囡，而朴軫永的兩位女兒就分別在18及19年出世。Rain搞笑表示好彩女兒似足老婆金泰希，有一對雙眼皮大眼，而朴軫永亦指囡囡外型上似媽咪多啲。四位星二代年紀相近，令辦娛樂公司做得有聲有色的朴軫永忍唔住出聲，指第時兩家千金可以齊組女團，有齊靚女基因同爸爸嘅強勁實力，睇嚟十幾年後出道絕對可以成為「怪物新人」。