【星島獨家】自揭曖昧關係..... 黃宗澤︰陳瀅正一『茂利』

多情卻不談情，型男都要轉型！黃宗澤透露在新劇《非凡三俠》中，一眾男神都要放下光環、展現「合理的缺陷型」；編劇陳十三則透露劇中打到「飛起」，又有許多情感位，但偏偏就不談愛情。新劇不設愛情伏綫，但現實中黃宗澤與陳瀅爆緋聞，有否發展伏綫？黃宗澤斬釘截鐵否認，還封對方做「褦襶（呢啡）」女神，笑言還有兩招對付對方作自我保護！

由樂易玲及鄧衍成監製、陳十三編劇的邵氏新劇《非凡三俠》集多位男神女神於一劇，由黃宗澤（Bosco）、張智霖（ChiLam）、周秀娜（娜姐）主演，還邀得視帝陳豪和王浩信、王敏德、高海寧、沈震軒、吳業坤等客串。劇情講述素未謀面的三位主角，被捲入一系列神秘案件，遭警察和黑幫追殺，要一起聯手化解危機。而動作連場的《非》表面上是懸疑劇、實際上……Bosco和陳十三形容：「非口述所能形容！」

不停撩娜姐

是喜劇、推理劇、愛情劇還是動作片？Bosco與陳十三異口同聲指《非》劇是首次接觸的新題材，亦是陳十三首度撰寫一部六集的短篇港劇。陳十三稱：「我會形容係一部觀賞體驗劇，係幾有趣的創作，但就無法將整個故事講出來，因講完都唔會明，每個人睇完都會有唔同的角度。我跟三位主角講，這部劇很危險，只要有一個位行差踏錯半步或拿揑不好，整套劇都會好難睇，但三位主角都做得很好，兩大男神Bosco和ChiLam唔爭戲份、仲拍得相當爭氣，不單止互相幫對方做戲，仲一齊『搞㷫』娜姐！」

Bosco解釋因對自己、ChiLam及娜姐而言，都甚少拍這類新題材，可能因此娜姐最初顯得有點緊張，加上其角色很複雜、很有難度，所以與ChiLam不停「撩」娜姐傾偈和「整蠱」她，令她輕鬆一點從而演得更放。

部劇的最大遺憾

開劇之初，樂易玲講明要招攬高大型男、胸肌必須超過40吋，連陳十三也笑言險些無得入組！對於今次男神對決，Bosco笑指樂小姐每次開戲都用這個口頭襌，反而今次劇中不管是男神或視帝，大家都一齊「玩唔型」、個個都「貼地氣」，即使本身外型有幾型都要搞到有缺陷，是合理的缺陷；自爆在劇中就玩粗豪，大部分時間都是「爛撻撻」兼滿臉鬚根。

劇中打鬥連塲，提到難忘場口，Bosco稱有一幕要「一打六」，還有一幕由三樓高吊威也險跌下的場口；而第一集播放在馬來西亞地鐵站打到上巴士車頂的動作槍戰戲亦很深刻，事關拍足幾天，是全劇拍得最耐的戲分。他謂：「雖然打得好辛苦，但又好享受，因為大家一起設計動作，動作中有玩、玩中又有戲，即使炎熱下連拍幾晚通宵，但上下齊心好開心。」不過講到最喜歡的場口，Bosco認為是結局的一幕，形容為笑中有淚。豈料陳十三爆料指：「由於劇中有太多男神，預算難免用到七七八八，連結尾都無錢拍，原定的甚麼爆破、打鬥等大場面都沒有經費，唯有臨場改劇本，而成敗關鍵就取決於三位主角，結果超滿意，既感人但又有笑位。」二人表示很期待開拍續集，不過監製鄧衍成於7月初因病逝世、無緣看到劇集出街，成為這部劇的最大遺憾，因此希望有好成績以作為向對方的致敬。

愛食人口水尾

Bosco於《非》劇與娜姐這位女神結劇緣，在《飛虎3之壯志英雄》中又夥拍另一女神陳瀅有感情綫，不單止戲內有連場激吻，戲外又孖住做視頻直播且狀甚親暱，陳瀅更對着Bosco的人形紙牌伸脷示範激吻，又拿起Bosco的凍檸茶飲口水尾，被指感情非一般有曖昧！問到是否真的「過電」？Bosco說：「陳瀅嗰條『茂利』！佢雖然係女神，但其實『褦褦襶襶』（呢呢啡啡），人哋話佢攞我杯檸檬茶飲好暖昧好親熱，其實佢本身就係咁樣；佢會話呢個好食就叫人整啖來食吓。（唔只食你一個口水尾？）三哥佢都會呀，當時講明杯嘢係我，佢都照飲，仲一副無所謂樣。」

彈佢條脷

至於陳瀅對着其紙牌伸脷，Bosco稱：「佢又唔係向我真人伸脷，向我個紙牌之嘛！（向真人伸脷會點？）『冚』佢囉！佢再癲啲就『彈』佢條脷、一伸就『彈』，幾好呀，哈哈！」笑問是否寧得罪小人都莫得罪Bosco？陳十三插口稱：「唔伸脷就無事！」Bosco續謂：「佢玩啫，佢對導演都係咁，會話自己生日，叫導演錫佢，總之唔係特別優待我，佢對住好朋友就男女都一樣，佢同蔡思貝都會攬頭攬頸，好玩得。」可擔心受緋聞受影嚮？Bosco想也不想即謂：「有乜影響呀，我哋都無嘢！觀眾和讀者唔係蠢，睇完笑吓就算，又唔係乜嘢；佢都係貪玩啫，真係外表係女神，內裏係男仔頭、係『呢啡』！」

撰文∣林子棠　攝影∣譚志光

原文刊於《星島日報》名人雜誌（逢周日見報）