保錡驚爆背女友偷食34E沙津 舊愛Carrie慘被分手寫文控訴:佢經常flirt女

搞笑男子組合ERROR成員吳保錡(Poki)尋晚被爆暗撻33E「性感女神」張沛樂(沙津)，二人前日被發現在元朗甜蜜拖手睇紅葉。對拍拖一事，保錡以短訊回覆傳媒：「其實我下年都30歲，都應該為未來打算吓，2021希望所有事都做得更好。」而沙律則默認戀情：「我同佢都夾，而且佢情商好高，都符合我想要嘅。」不過今日再有消息指保錡原來有一名歌手兼Model的正印女友賴嘉賢（Carrie），她接受傳媒訪問時聲稱同Poki從未分手，保錡疑似偷食喎。

據報道指，Carrie與保錡拍拖接近兩年，去年10月30日是Carrie生日，保錡更和她一起慶祝。Carrie睇報道後得知保錡與沙律的戀情後大感愕然，直言與保錡仍然是情侶關係，只是對方近兩個月態度突然變得冷淡，但從未提過分手，不過Carrie表示會找保錡好好傾談。

今日記者向保錡查詢偷食傳言，他坦言與前女友已經交代清楚關係，表示大家已經沒有聯絡一個月，他透過短訊回覆：「同前女友已經冇聯絡一段時間，回復單身後，我同沙律剛剛開始發展，希望大家俾多啲空間。下年已經三十歲，要認真為未來打算，所以會更加努力專注工作，希望未來得到更多人認同及認識。」

而沙律亦回覆傳媒表示對男友 100%信任，自己亦非第三者，她說：「我知道晒所有事，我100%支持保錡，我亦知道佢個Ex係邊個，無隱瞞嘅成份，同我一齊嘅時候佢哋亦都無聯絡，但我真心不理解點解女方話2、3個月保錡對佢冷淡，女方完全無搵過男方溝通，亦完全無聯絡，突然話穩定中拍拖，不過佢哋已經溝通好，我亦都唔想大家有任何嘅傷害，亦都唔想大家去攻擊保錡或者有不必要嘅猜疑。」對於會否擔心被指是第三者？沙律說：「我唔會擔心，因為根本就唔係！我諗保錡已經交代得好清楚。」

至於被蒙在鼓裡的Carrie大受打擊，今日在IG上載黑色照片及在限時動態分享千字文表達「被分手」感受，提到與保錡一起兩年多，與對方想法和年紀相近，一直以將來為前題認真交往，又指保錡曾邀請她出席家人聚會，認為大家關係穩定，沒想到最後突然「被分手」。Carrie坦言拍拖期間一直很沒安全感，因為看到保錡與其他女生flirting，但又說服自己保錡是為了工作才這樣做，最後Carrie指保錡沒有正面說分手，感覺很不被尊重，坦言這段關係令她更了解自己，會收拾心情，努力工作。