【獨家】粉絲遠至韓國阿拉伯 倪辰接受異國追求者只要真心

倪辰（Lala）繼2018年《忘憂草》及2019年《愛像龍捲風》後，最近推出第三首全新個人單曲《失戀症侯群》，LaLa坦承新歌是講個人經歷，失戀過5次的她用歌曲分享這些戀愛經歷及感受。自從19年配合歌曲推出過寫真集後，本身做直播平台主播的LaLa更加受歡迎，粉絲高達50萬，遠至韓國及阿拉伯都有，更有粉絲向她直接示愛，單身的她坦言不介意粉絲追求，但首要是真心。採訪：杜淑霞 場地：南瀛水產

Lala新歌《失戀症侯群》以一段將逝去的愛情為背景，她相信每個人也曾遇過感情創傷，歌曲就是描寫每一個女生以往段段放不開感情。她坦言這也是自己親身感受，曾慘為男方放棄歌手夢想，「人就係咁傻，明知感情變咗質，仍會委屈自己去挽留，每段都係咁，留住人留唔住個心，不如灑脫啲。我以前仲未識咁諗，未人行做主播仲做緊模特兒時，已經有幾間唱片公司搵我，但係當時男友唔鍾意我就放棄機會，𠵱家諗番有少少後悔，會識諗自己愛自己多啲，自己為自己人生做決定。」




為夢想不急拍拖


做主播已人氣高企的倪辰，出道以來在內地不少地方登台，已儲落一大班粉絲，加上推出寫真集《Fall into Lala》知名度更高，不過她強調並非想走性感路線，「係經理人提議我出埋寫真集幫助宣傳，佢知道我由細到大都好鍾意唱歌，中學係咁參加歌唱比賽，贏過學校同校際嘅歌唱比賽，冇諗過可以真係做歌手，係經理人畀信心我，推出新歌同時出寫真集，只係想令人快啲記得我，再認識我嘅歌。」LaLa坦承推出寫真集確實好有宣傳效果，她在「Uplive」做主播的粉絲暴升三成，已高達50萬個，「有直播粉絲話『見過你本寫真，書展見過你』，我一開始冇諗過出寫真集，太性感克服唔到有啲尷尬，啲朋友見到點算呀！但證明經理人呢個提議係好嘅，真係有宣傳效果，就算未必記得首歌，都記得個名啦！」

現在LaLa的粉絲遠至阿拉伯、韓國、日本、印尼、台灣及內地，她透露阿拉伯及韓國的粉絲特別熱情，「做咗年幾直播之後，發現開始有海外粉絲，我會用英文同佢哋傾偈，阿拉伯同韓國有個粉絲真係好吸力，每次出現都勁送禮物㗎！韓國個粉絲仲試過示愛，不過都係讚賞嗰種冇乜特別意思嘅。（笑問她會揀油王定oppa？）哈哈！睇邊個愛我多啲，我唔介意有粉絲追求，但係首要係真心先得。」不過26歲、單身幾年的LaLa，不心急拍拖和結婚，因想努力實踐歌手夢想，「幾多歲結婚真係冇所謂，我想專注歌手工作先，我短期內目標係出多兩、三首歌，經理人話到時可以開個小型演唱會；另外，希望自己可以寫到歌，令大家覺得倪辰呢個名，唔單止出寫真，仲係一個歌手嚟，希望大家睇清楚我唔係靠個樣，知道我真係鍾意音樂。」