晒胀卜卜靓肌玩直立板过大除夕 泰国男神Nonkul埋唔到岸吓亲

泰国最高票房电影《出猫特攻队》于17年在港上映，当年两位泰籍男主角都迷倒唔少香港妹子，当中最受欢迎系喺港产片《一秒拳王》中饰演香港拳王，同周国贤压轴大战嘅泰国男神Nonkul （Chanon Santinatornkul），就系因为演拳王，拍摄前努力操肌兼学打拳，电影拍完一段时间，难得男神仲Keep到副靓偈。

今日系大除夕，男神约埋屋企人去咗玩直立板过埋2020年最后一日，半裸嘅佢玩得好过瘾，愈划就愈出开始有啲担心，但佢姐姐仲系挂住影相，男神斗气谂住自己划返岸，一直划一直划，但划极同姐姐嘅距离都冇分别。「所以我停止划，然后跳落水边游边推板。大约一分钟后，我转身望住佢哋，发觉离佢哋更加近。」吓亲嘅男神忍住同姐姐大叫，「你见唔到啲浪同风将我哋吹向大海」众人听毕男神说话开始恐慌，亦开始努力划桨。

众人努力划10分钟，但结果系，「我哋仍然停留喺同一个地点或更远嘅地方。」而男神姐姐因为块直立板郁唔到而吓到喊，男神形容佢哋为3只被困海中心嘅猪，「我哋开始惊，但突然发现我哋都有电话，哈哈。」最后，佢哋就打电话畀工作人员求救嘞，对于呢个结束2020年嘅方式，佢话系Happy Ending喎。