【獨家】分享喪妻心路歷程為同路人打氣 林子博變身心理醫生

分享喪妻心路歷程為同路人打氣 林子博變身心理醫生 林子博上周六（19日）為《頭條開Live》出任嘉賓，今次主題係《「董」得好生活-生命戰士的奇蹟》，子博跟小董中醫博士及癌症病人惠珍分享患病及中醫治療經歷。今年嘅冬至，正值太太董燕君離逝兩個月，因為肯講肯同人分享，子博漸漸走出喪妻陰霾，甚至做埋同路人嘅心理醫生，未來他樂於參與一些單親分享會，和家長們互相交流，支持及打氣。 採訪：方騫平 攝影：李維隆

做慣主持嘅林子博喺直播期間反客為主，追問作為醫師嘅小董博士如何面對家人患癌呢？豈料搞喊小董醫師，原來她婆婆年前離逝，至今她仍未釋懷。事件中令子博得到反思，「其實由太太患病至離開，我幾乎每次做訪問都會喊，只不過爆喊次數會愈嚟愈少，因為漸漸好似變咗講緊人哋嘅故事咁，好似抽晒入面啲瘀血出嚟，會冇咁辛苦，醫心病好重要。」

子博最近更變身心理醫生，成為同路人主動傾訴對象，「最近有個懷疑醫療失誤，喪妻嘅男士私訊向我求助，我就即晚去咗佢屋企，大家坐喺天台『吹水』，其實話題唔特別，有心靈寄托就夠，希望未來都可以幫多啲人，尤其單親家庭，因為喺我囝囝11歲呢個年紀，父母都因為離異，我生長喺單親家庭曾經學壞畀警司警誡，關心單親子女相當重要。」

現在子博跟子女會經常分享生活點滴，他更從子女口中，會聽返一啲未聽過嘅說話，譬如老婆曾同囡囡講私密，話她走後，爸爸會好快有女朋友！子博聽完都笑咗出嚟，「佢(亡妻)實在太低估佢對我嘅影響力，同埋太高估我嘅魅力！子女對我最重要，第時嘅女朋友首要愛埋佢哋。」