嘆台灣拍劇冇女埋身 姜濤睇好《造星III》Manson

男團MIRROR成員姜濤今日出席商場活動，疫情下仍吸引近百姜糖（姜濤粉絲名）捧場，場面熱鬧！11月在台灣拍完劇返港後便工作不斷，姜濤表示：「我不太清楚收入，都是阿媽幫手理財，感激疫情期間仍有工作。（隊友會否妒忌？）不會啦！MIRROR的工作量都幾好，各有各忙，生活咁無趣，就算冇工作也會自我增值，例如我也有學唱歌跳舞，哈哈！」

問到就快聖誕，會否識個女朋友令生活有趣啲？醒目的姜濤即硬Tag新歌《愛情簽證申請》：「沒想過，自己也沒打算遞交簽證申請。不過公司冇限制拍拖，只說自己做的事自己負責。」早前姜濤媽咪叫囝囝搵返個台灣女友，姜B又點睇台灣女生呢？「係呀！可能因為媽咪想移民台灣啩，哈哈！台灣人很熱情，又很照顧我，男女我都鍾意。」他直言在台灣冇女埋身，皆因台灣大把靚仔，自己在當地不入流，相當謙虛！

姜濤是第一季《全民造星》冠軍，所以亦有留意《全民造星III》的師弟妹，他睇好參賽者Manson（張進翹），更趁機幫隊友Stanley（邱士縉）的女友Alina（李靜蓮）拉票，大讚呢對情侶身材都好好。姜B又自爆收到花姐落Order，明年要操好身形，向Stanley的肌肉型進發。至於會否夠膽好似隊友Ian（陳卓賢）及Anson Lo（盧瀚霆）般拍劇除衫騷肌？姜濤說：「我台灣拍《超感應學園》也有除衫戲呀，但冇咁勁。（留返拍港劇再除多啲？）如果有呢一日會開Live通知大家！」