【維港會】婦人車尾整理輪椅擬上車 的哥突開走疑拒載

多個網上群組近日流傳一段車Cam片，有一名婦人推著坐輪椅的伯伯擬截乘的士，但當她將輪椅推到車尾時，的士突然開車離開，並在前方不遠位置，接載另一名乘客。有網民質疑司機拒載輪椅客，亦有人就指影片不能確定婦人是否有意截的士。

從影片中可見，的士向前開了一段後停下，隨後一名婦人推著乘坐輪椅的伯伯，從前方走到的士車尾，正打算把輪椅摺好放到車尾之際，的士突然開車離開，婦人顯得措手不及。該的士駛前接載了另一名乘客。

不少網民質疑司機拒載輪椅客，「個輪椅由前面，再由則(側)門去到車尾，應該瞎嘅都見到」、「當幫下人又好做生意又好。 咁樣開車接其他客真係豬狗不如」、「成日話無生意，簡(揀)客梗係無生意」。

不過也有人為的哥幫口，指片段中無顯示婦人有截的士，「條片睇唔到輪椅者有冇明示及暗示要坐車，只見到佢推去車尾，何況左邊車身根本冇足夠位置畀佢上車」、「我覺得兩睇，可以話見前面有客唔載輪椅客又得；又可以話唔知輪椅客要車，一心望前面有客就上」、「點解唔係上咗車先放輪椅去車尾？」