【維港會】梁美芬生日 同鄭松泰食同款美心蛋糕

呢期邊款生日蛋糕最紅？可能係美心西餅嘅「百利甜酒朱古力蛋糕」，除咗鄭松泰，梁美芬生日都係食佢。再睇真啲，兩人照片連拍照的姿勢角度都好似，有網民就「贈興」話「個美心蛋糕真係*泰*好食啦」。

梁美芬今日60歲生日，收到多個生日蛋糕慶生，照片上載社交平台。不過其中一個蛋榚特別搶鏡，原來係日前鄭松泰生日食嗰款美心蛋糕。兩人連拍照角度和姿勢都好似，立即成為網民熱話，更有網民將照片貼到鄭松泰的facebook專頁。

梁美芬就話，「因上年的社會事件和黑暴令好多家庭撕裂、社會分裂；疫情仍然肆虐，世界局勢緊張！所以美芬祝願：世界和平、人人康泰、家庭和睦、社會復和！」

不少網民留言祝福，仲讚個蛋糕好味，有網民話「芬姐識玩，鄭松泰都係食呢個蛋糕」。

日前鄭松泰生日，熱血公民成員鄭錦滿送上這款美心蛋糕，引起不少爭議，鄭松泰未有理會相關批評，但有回覆其中一名網民指「係啊，好食」。鄭松泰其後發文，指「我親身證實一次，點解黃絲大部分時間咁不可理喻」。