與黃貫中合作獲讚專業　鄧麗欣出山為新劇主題曲填詞

鄧麗欣（Stephy）近日為主演ViuTV劇集《男排女將》的主題曲《著地》親自填詞及主唱，更破天荒邀得大師級音樂人黃貫中（Paul）作曲及擔任歌曲監製。早前，Stephy到Paul的錄音室為歌曲進行錄音，對於二人首次合作，她坦言十分緊張：「第一日知道要同Paul合作已經好緊張，仲要我自己寫詞，好驚畀佢Ban我啲詞。中間我哋都有溝通過首歌要點唱，過程中我都好驚自己用詞不當，唔識用音樂語言同佢溝通。」Paul即笑謂：「唔好講到我好惡咁喎，哈哈。我記得我有問過Stephy『呢兩個字係咪差少少音？』，點知佢話『冇呀，我唔覺喎』。佢一啲都唔驚我，有時會同我爭論吓，有交流先好呀，唔係我話乜就乜。」

Paul又不忘大讚Stephy專業，錄音進度比原定預計時間更快完成：「證明掂先會早收工，Stephy比我想像中好好多，我冇必要擦鞋，真說話嚟，佢好舒服地錄晒成首歌，冇需要逐句逐句錄。」已有7年未有填詞的Stephy，今次為《著地》再度「出山」，她說：「其實都有考慮過好唔好自己寫詞，最後因為自己係套電視劇嘅主角，冇人比我更了解個角色，尤其係排球題材，我覺得自己寫返份詞最合適，同埋主要係因為冇錢搵填詞人，幫公司慳返筆錢，哈哈。」

談到受疫情影響，Stephy經常「Work from Home」，在家中有更多時間創作音樂：「因為疫情多咗時間喺屋企，睇多咗書，靈感都會多啲，好似呢首歌詞只係用咗一晚時間就寫到。另外自己都開始練返好耐冇彈嘅鋼琴，都試緊作曲，但只係有節奏喺個心到，未將佢哋拼接埋一齊。」在錄音工作接近尾聲時，Paul的愛妻朱茵亦親臨現場探班，大讚Stephy唱功了得，在旁的Paul就向老婆撒嬌笑說：「我呢？讚埋我啦！」