【維港會】港媽患病BB夭折 遭老爺質疑「食錯野」儼如傷口灑鹽

嬰兒夭折對媽媽而言是難以承受的痛苦。近日一名港媽在討論區上指早前因患上「妊娠毒血症」，導致嬰兒早產，終不幸夭折離世。但老爺竟認為「熱氣」導致嬰兒夭折，似暗批港媽沒有控制飲食，令港媽非常難堪。

港媽上周三（4日）在討論區「親子王國」發文指，自己在懷孕25週時不幸患上「妊娠毒血症」，而嬰兒在28週時早產夭折。住院時，老爺、奶奶會帶日用品給她，但老爺不時會質疑是港媽「食錯野」、「熱氣」，才會導致嬰兒夭折，令港媽十分難過。雖然奶奶已經多次提醒他，醫生亦曾解釋過「妊娠毒血症」至今仍未找到病因，但是老爺仍然堅持是飲食習慣不當導致嬰兒夭折，令港媽聽到後愴然淚下。「住院期間嘅時候佢同我奶奶嚟拎生活用品俾我，之後佢已經話我有BB嗰陣要飲多啲茶，話我成日唔飲茶（因為佢係一個好鍾意飲茶嘅人）。之後又話我係咪食好多熱氣嘢，因為佢聽到毒血症就以為係熱氣，好彩我奶奶比較明白事理，即刻同佢解釋返。到我bb離開嗰陣我哋同醫生姑娘傾返件事，我老爺又係咁講，話係咪我食咗啲乜嘢啊，之後又話BB出世其實無7個月大，似5個月。我嗰陣已經好唔開心係咁喊，然後佢又不斷講」。

港媽稱出院後老爺仍不斷重提此事，不斷暗指港媽胡亂進食導致嬰兒夭折，又經常稱與嬰兒沒緣份等等，令到港媽忍不住在親戚面前痛哭。港媽表示現時聽到老爺的聲音便會感到害怕。「之後又係咁話我同BB無緣份、呢啲嘢整定，其實呢啲說話真係好難聽，我成日偷偷喊。然後我老爺無啦啦話佢嗰啲親戚過嚟探我，其實我真係唔想，因為佢哋一嚟我又要聽嗰啲說話，之後佢啲親戚到啦，然後我老爺又係咁不斷講。然後佢啲親戚見到我喺度喊，已經話不如唔好再講，但是我老爺自己又係咁喺度講話食嘢係好大關連，又話食錯乜嘢、無食乜嘢就會搞到咁，我真係好辛苦，可唔可以唔好再提」。

不少網民都紛紛留言鼓勵港媽，「唔好喊，你現在坐月中，身子要緊」、「建議樓主可能返自己父母屋企一排，小産後親人嘅關心好重要」、「你都要加油，最緊要保暖，好好坐月，養好身子」。

據資料顯示，「妊娠毒血症」是一種罕見且嚴重的妊娠併發症，病發於懷孕中、後期，或剛生產後。此症可引發痙攣、或肝、腎、肺衰竭及凝血問題，會對孕婦及胎兒的健康和性命構成威脅。