【獨家】確診新冠肺炎後狂接廣告 施匡翹因禍得福知名度狂升

45吋「長腿女神」施匡翹(Zaina)因是首位新冠肺炎確診女藝人而知名度倍增，更吸引到唔少廣告客戶，她坦言算係因禍得福：「因為樣樣都係好事嚟，但唔可以靠呢啲『優勢』食老本，未來真係冇人知，我覺得人生好無常，所以每日要健康、開心。」採訪：方騫平 場地：Imini partyroom 形象：Janae陳灝而 化妝及髮型：Wingkee Makeup

施匡翹康復後推出新歌《差不多小姐》，歌曲講述中學生上興趣班時暗戀男仔嘅一段真實經歷，因為她太慢熱，最後冇結果，之後Zaina冇再暗戀人：「我鍾意較穩重及有幽默感嘅男仔，好似MV男主角林德信咁，太靚仔冇乜安全感，正常合眼緣就得。」

雖然施匡翹已康復，但都Keep住3個月定期覆診，為怕有機會復陽做過多次檢測才復工：「Check到我經已有抗體，短時間內都唔會傳染到畀我，所以我反而好放心。」而她患病期間，隔離唔用針藥和被誤傳「用鹽抗炎」都惹來非議，問到係咪人生最難過嘅階段？她不認同：「相比之下我覺得考DSE難過啲，入院時我冇唔舒服，全程好似用第三者角度睇嘢咁，隔離期間都係睇書做運動。」施匡翹從確診確體會到人生無常：「做自己鍾意做嘅嘢經已好幸福，𠵱家要把握機會，嘗試多啲嘢，同埋重視健康，早啲瞓覺唔好捱夜。」