【維港會】深水埗770元腸粉團被指搵笨 導遊深度拆解獲網民力撐

政府放寬本地團人數限制，各式各樣的旅行團陸續活躍起來，日前有傳媒報道旅發局推薦的深水埗美食團索價770港元，質疑是「搵笨」，更派人實地測試200多港元已經可以光顧6間店還包括手信。負責帶此美食團導遊在網上發文反駁，表明團隊的「貴」在於社區深度遊，3個半小時內了解香港「作為一般旅客無法認識的一面」，獲過千名網民讚好支持。

facebook專頁「尼泊爾人妻．喜馬拉亞餃子」今日撰文，稱她就是負責該本地美食團的導遊，透露該團已經有8年歷史，她入職帶團4年來接待過來自歐美、澳洲、中東、印度、日本、南韓的旅客。至於港人，「10隻手指數曬。通常係因為工作，幫公司搵活動畀外國同事玩。所以香港人見到呢個腸粉團，一定感到匪夷所思」她直指，在旅遊旺季時她一星期要帶5團，其他導遊都要密密接團。

她表明，「如果你對美食團的認知，只係流於食完間餐廳打完卡就走。咁個團真係好貴。自己Google搵餐廳去食就夠了。」

對外國人而言，如果冇人帶住，無辦法跟深水埗一批中老年夥計落單。「餐牌全中文? 餐牌咁多野食要Order邊樣呢? 其實腸粉應該點食呢? 啲醬係咩嚟架? 呢撇混醬加澱粉點解會俘虜咗咁多港人嘅心?」她質疑，「你可以話所有嘢問Google都會有答案。但Google應該答唔到一個旅客，呢間舖頭嘅煮食秘方；老闆打拼咗幾十年嘅歷史；啲姐姐做咗十幾年對食客嘅感情」。

她又舉例，走在深水埗街上會睇到多老人、草根，但旅客不會知道他們住劏房、居住環境多麽惡劣、劏房租金等等。她特別提到帶旅客行街市，「旅客見到一條條活生生嘅魚即場劏完仲識郁，一堆血淋淋的生豬吊喺路邊成街咸魚加奇異海味。個班外國人嘅驚嚇反應每每令我笑得很爽。笑完後，就要解釋香港的街市文化。點解食物處理上，亞洲人同西方人分別咁大; 食物除咗味道以外，中國人仲有食療。我地食嘅補品，湯水，係多年嘅民間智慧，大部份亦有科學根據。另外，次次都要重申香港人唔食蝙蝠同狗肉的」。

她認為，「如果冇人帶住班旅客，佢地只會O咀影相，返去同朋友講 『Hong Kong market is so dirty and scary』（香港街市是多麽骯髒及可怕）」她形容，她的工作是旅客同香港之間的語言及文化橋樑，很多旅客來香港只是短短3至4日。外國人甚至不是來香港玩，只是公幹或開會，難得周末不用工作，用3個半小時精華遊香港地道美食及深入了解一般市民或草根階層的生活。不是去山頂或主題公園，而是真切地去了解一個城市的面貌。

她解釋，「請問有幾多人去到全世界都搵到一位本地朋友，有時間，有語言能力，對社區文化，美食，歷史都有認知同研究，同你玩半日社區美食深度遊呢？...每日我嘅工作就係識世界各地的新朋友，分享我對香港嘅認識同愛。」

她自言是一班致力想改變香港旅遊業的導遊，令旅遊業離開鴨仔團或購物團模式。因為疫情港人才開始本地遊，「對於純想食深水埗美食嘅香港朋友，呢個團緊係唔洗報啦」。她希望「大家笑完$770蚊可以食幾多碟腸粉後，支持一下我地一班愛香港，愛推動旅遊業的新型導遊」。