【獨家】希望在樂壇識多啲朋友 曾若華激讚連詩雅係女神

連詩雅(Shiga)最近與舊唱片公司，華納小師妹曾若華(JUDE)合唱新歌《零分》，歌曲由JUDE獨唱版變成合唱版，獲得不少樂迷讚好。提到連詩雅，JUDE好興奮仲自爆合唱時忍唔住心心眼望住對方。採訪：方騫平

連詩雅接受曾若華邀請，演繹JUDE新歌《零分》嘅合唱版，JUDE開心到飛起，講返件事都眉飛色舞：「搵合唱版拍檔，我第一個諗起佢，因為佢把聲非常適合唱情歌，可以提升首歌。而且好少有兩個女仔唱一首情歌，都想試少少新嘢。

當問到可會擔心被搶風頭？JUDE即說：「又冇擔心過喎，好多人唔知我哋係朋友，大概20歲我啱啱簽華納，當時幫佢拍《說一句》歌詞版MV，佢仲話我係小妹妹，疑惑會唔會拍得好？好彩效果滿意。之後我哋會一齊行山做義工，就算𠵱家唔同唱片公司，佢都好似師姐咁照顧我，我哋互相支持鼓勵係好好嘅朋友。」JUDE又說公司想佢識多啲人，同多啲人溝通吓，「我哋呢行係好需要朋友。」

JUDE大讚Shiga真係唱得好好：「首歌係寫兩個女仔嘅愛情經歷，當同另一半鬧交，就會諗返以前美好嘅回憶，兩個女仔因而互相安慰。呢首歌真係適合佢唱，我第二次唱慘情歌，未融入到風格，係一個大挑戰。合唱當日我小fans上身係咁望住佢，好開心呀！佢好靚女，當年第一次拍MV見佢真人，嘩！係我眼中嘅女神，至今不變，我真心鍾意佢唱歌，佢個樣同佢個人。」