【独家】希望在乐坛识多啲朋友 曾若华激赞连诗雅系女神

连诗雅(Shiga)最近与旧唱片公司，华纳小师妹曾若华(JUDE)合唱新歌《零分》，歌曲由JUDE独唱版变成合唱版，获得不少乐迷赞好。提到连诗雅，JUDE好兴奋仲自爆合唱时忍唔住心心眼望住对方。采访：方骞平

连诗雅接受曾若华邀请，演绎JUDE新歌《零分》嘅合唱版，JUDE开心到飞起，讲返件事都眉飞色舞：「搵合唱版拍档，我第一个谂起佢，因为佢把声非常适合唱情歌，可以提升首歌。而且好少有两个女仔唱一首情歌，都想试少少新嘢。

当问到可会担心被抢风头？JUDE即说：「又冇担心过喎，好多人唔知我哋系朋友，大概20岁我啱啱签华纳，当时帮佢拍《说一句》歌词版MV，佢仲话我系小妹妹，疑惑会唔会拍得好？好彩效果满意。之后我哋会一齐行山做义工，就算𠵱家唔同唱片公司，佢都好似师姐咁照顾我，我哋互相支持鼓励系好好嘅朋友。」JUDE又说公司想佢识多啲人，同多啲人沟通吓，「我哋呢行系好需要朋友。」

JUDE大赞Shiga真系唱得好好：「首歌系写两个女仔嘅爱情经历，当同另一半闹交，就会谂返以前美好嘅回忆，两个女仔因而互相安慰。呢首歌真系适合佢唱，我第二次唱惨情歌，未融入到风格，系一个大挑战。合唱当日我小fans上身系咁望住佢，好开心呀！佢好靓女，当年第一次拍MV见佢真人，哗！系我眼中嘅女神，至今不变，我真心锺意佢唱歌，佢个样同佢个人。」