【Headline Girls】張沛樂　女生自強

現年28歲的「沙律」張沛樂有份參演的ViuTV新劇《熟女強人》正在熱播，劇中，首拍「SheShe」戲的她飾演傅穎（Theresa）的前度，問到二人有否親密鏡頭？她說：「冇Kiss，但有攬攬抱抱，啲激嘅畫面唔喺我身上。（恨拍SheShe激情戲？）都想嘅，自己都未試過拍呢類戲，其實每個人都有一次同異性拍激情戲嘅經驗，但我都未有就同女仔拍……不過都冇乜所謂啦，又唔係我揀嘅。」但謂自幼便喜歡台灣型男鄭元暢，盼將來有機會跟對方合作。

至於現實中，可有女生曾對她產生愛慕之情？沙律笑稱：「唔會㗎，冇女仔鍾意我，因為我見身邊好多女同性戀朋友，通常女仔嗰邊（TBG）嘅都較嬌嗲，而我性格比較男仔頭，但男仔嗰邊（TB）又通常短頭髮、好男仔，咁我又唔係喎，所以佢哋都未必揀我。」

講到性格直率又剛強，擁33E、23、34.5火辣身材的沙律自然不乏追求者，不過她卻唔恨嫁入豪門做少奶奶，曾獲有錢仔追的她說：「我會先觀察吓對方為人，嗰時自己都有啲卻步，主要都係溝通問題，相處過後發覺對方以為自己講嘢好好笑，但其實我覺得一啲都唔好笑，咁樣已經相處唔到啦，之後又夾硬搵嘢嚟講，咁強求就算啦，最後都冇一齊到，真係冇感覺。（如果一齊咗就印印腳唔使撈喇，哈哈！）使乜啫，自己印印腳唔得咩！我從來冇諗嫁有錢人，好彩屋企都算小康之家，所以錢唔係我人生目標，反而想努力工作證明自己，我寧願搵個同我傾到偈，兩個人或者一齊萌生到新事業，咁咪仲好！」曾被撩陪老細一夜情的她又表示唔稀罕搵「快錢」，相信靠自己都賺到錢買磚頭。