疫情下少咗工開 《造星II》人氣王張天賦被鐵粉力撐好感動
2020-10-19 10:30 
疫情下有接近半年時間冇開放現場觀眾睇show，12個演唱單位小塵埃、布志綸、泳兒、陳柏宇、陳健安、陳潔靈(率張天賦MC、柳應廷、Eagle Chan、Lucas Chuy、梁瑞峰、陳樂)及湯駿業、鄧小巧、盧巧音、鍾舒祺、鍾舒漫、ERROR、6 號@RubberBand日前喺旺角麥花臣場館參與《埋班作樂》作品展。雖然在限聚令下令可以入場嘅人數減半，但依然吸引到大批粉絲撲飛到場支持。其中人氣王張天賦，同埋屬於ERROR嘅193嘅粉絲最為活躍，大批粉絲喺開show前幾個鐘已經喺場館門口排隊，而MC嘅大字燈牌更加係閃爆全場。
前輩陳潔靈(Miss Chan Chan)喺《全民造星II》中曾出任星級導師，還力讚MC係咁多個入面，令她最驚艷一個，成功搶他入團隊，今次台上合唱《標本》重拾當日情懷。
MC坦言疫情下出show嘅機會少咗好多，就算想去下busking都好易被人趕走，始終都驚會引嚟太多觀眾喺街頭聚集：「所以見到咁多粉絲冇唔記得我，諗盡方法到場支持，都覺得好感動。」近期MC真係開始體驗到出道嘅生活，除咗唱歌，還幸可以參與到其他歌手MV嘅拍攝工作，又拍咗自己個人嘅第一個廣告，過足戲癮之餘，同20人嘅製作團隊全日開工，亦都體會到大製作嘅興奮。MC仲透露短期內都會接受一位女歌手嘅邀請，為其歌曲錄製合唱版，疫情下都叫有工作做。
至於個人單曲幾時發行？MC表示目標依然係出年年初，現階段一直都有聽緊唔同嘅demo做準備：「始終係第一首屬於自己嘅歌，好想做好佢，我係有啲執著同埋選擇困難症。不過，𠵱家我經已搵到屬於自己嘅聲音，應該可以比到樂迷驚喜。」
最新回應