【維港會】網民批女人三十擇偶仍挑剔 遭反駁愛情非「年晚煎堆」

「女人三十爛茶渣」？網上討論區「親子王國」有女網民發文，批評身邊所見的單身女士，踏入30歲過後仍然揀擇，認為女士們錯過了最好黃金時間 ，無條件挑三揀四。

女網民發文指，最近學烘培認識了一些女士，外表端好、在職場打滾近10年，大約已經30歲，部分仍然是單身。女網民認為，這些女士當中性格都溫和，工作地方又多男士 ，也多參加交友活動 ，雖然想拍拖，但都說找不到伴侶。網民認為「我無追問佢哋想搵咩人 ， 只係覺得佢哋係有要求 」。

網民自言「當然單身都可以好好」，「我自身難保 ， 都唔得閒理佢哋啦 」。 網民覺得「3 字頭女仔 ， 錯過咗最好黃金時間 ， 在愛情間不停追尋 ， 追夢 ， 係等高富帥出現 ? 睇得韓劇過多 ?就算等到高富帥 ， 幾年後生唔生 BB好 ？ 唔係高富帥係咪就唔可以同佢一齊呢 ?」

不過其他網民有不同看法，有人認為愛情不是「年晚煎堆」；有人說「她們心目中的Mr right 唔一定係高富帥。其次，享受住單身生活去等自己心甘情願投入去愛的Mr right出現，而唔係寧濫無缺騎牛搵馬⋯⋯ 無論最終找不找到對的人，我都欣賞這樣的女孩子」；「你揀人，人揀你，又或者佢哋中意單身呢」。

但有人直言，有些女士單身太久性格也會變得狹隘，「但係等下等下... 性格都會越來越古怪，見好多都係咁」；「我見有啲朋友年輕時也ok 近呢幾年變咗怨婦，我唔知同大環境有無關係 只知佢哋對生活有好多不滿，坦白講 如果目標係一定要結婚 33-34前都可以揀擇一下，38歳以後真係無乜機會」；「黃金時間好重要。我好多朋友廿幾好揀擇，有條件好又話無情趣，卒之34、35都未穩定落嚟，得個恨字，但後生明明好多人可以選擇，而家已唔夠啲妹妹仔嚟，就愈來愈慌」。

有人認為女士們應該放開心胸去接受，「寧缺勿濫呢句說話造就咗好多單身女，真係害死人，其實拍拖係比機會自己知道咩類型性格啱自己, 同埋學應該點同男朋友相處, 有過程經歷先可以塑造人生，下下都一定係Mr. Right, 比你遇到都唔識相處之道啦! 拍拖都要rehearse 幾次先可以修成正果, 邊有要等到完美先去馬架」