【唔係呀嘛】質疑女神陳欣妍外貌進化史  喬寶寶：係咪普通師奶咋？

啱啱返咗去蘇格蘭同老婆及兒子「交人」嘅喬寶寶，離港前鬼咁開心，因為可以同到樣靚身材正，34C「女神」陳欣妍（Shirley）合作拍中印獨立電影《我男友係好差》，有額外「花紅」梗係特別醒神啦！既然一拍即合，兩人仲話升呢上契做埋契父女添，感情真係好到不得了㗎！不過，所謂「人怕出名豬怕肥」，喺疫情下仍然頻接廣告嘅「女神」Shirley即被大踼爆，搵返佢喺2016年出道前3年(原名陳曼姿)嘅舊相嚟對比，相中不論鼻樑、下巴、面型都判若兩人，尤其冇咗驚嚇嘅闊大豬膽鼻，完全改做成為另一個人咁！同19歲時比較，Shirley完全係經歷過宇宙超級大進化！

反問點解會爭咁遠
頭條娛樂記者考吓寶寶眼光，畀7年前Shirley參加銅鑼灣地帶「型男潮女大賽」參賽相畀喬寶寶睇，問吓佢知唔知相中人係邊個？寶寶不以為意回答：「普通人囉，普通師奶…估唔到呀！」記者只好畀貼士：「咩師奶呀？係女神呀？」喬寶寶即用懷疑聲調，加埋唔多層次笑聲反問：「唔係Shirley呀？哈哈哈哈…係咩？你哋點樣發覺到係佢？點解會爭咁遠嘅？咁大轉變嘅？點樣轉變得咁犀利呀？外國定係香港醫生(整容)呀？完全兩個人呀！嗰醫生一定發達啦！否則點解可以爭咁遠？我覺得係惡搞多啲，如果真係Shirley，應該一早就畀人踼爆咗啦…呢個世界真係有奇蹟㗎！」

堅持上契唔會縮沙
隔咗陣，仲係難以置信嘅喬寶寶唔多「順氣」，主動搵返頭條娛樂記者「理論」，語帶堅定話：「我睇嚟睇去，到𠵱家都唔相信呢個係我女神呀！因為細睇連牙齒、身形都唔同晒，如果係真，咁佢都幾懂得為自己部處，由樣貌、牙齒、身形…全面改造先加入娛樂圈。」問到𠵱家寶寶仲會唔會視Shirley係女神，收佢做契女呢？寶寶堅決道：「照契！因為做任何一樣嘢，有動搖就好難成功。佢係我女神，地位不變，因為佢真係索，而且始終唔相信相中人係佢，唯一驚嘆科技發達及醫生優質技術，可以令到一個人脫胎換骨。」咁寶寶可唔可以接受喬嫂嫂進化2.0？他則馬上說不：「我對咗佢30年，如果一吓子改變，好難會接受。」