預祝李蕙敏「入五」 51歲張可頤chok住擺港女甫士

2020-09-30 10:00

於10月4日李蕙敏（Amanda）正式「入五」。喺新冠肺炎疫情下，Amanda留港湊住兩歲養子Michael，甚少外出。不過，於生日前夕就放肆一吓，撇低英籍老公Serge及囝囝，應張可頤（Maggie）及幾名友人邀請，提前為她慶生，展開今年生日首餐生日飯。

昨日Amanda喺IG開心share慶生相，見相中她跟張可頤及3名朋友，喺維港夜景下寫意地享受晚餐，Amanda更留言答謝好友：「謝謝好友的美意，舞台劇《但願人長久》造就了我們的友誼！第一頓生日飯，身心皆豐盛（係一定會更豐滿），太滿足！」原來去年她演完張之珏執導嘅舞台劇《但願人長久》後，就跟Maggie做咗老友，仲不時約會。

51歲嘅張可頤單晒眼，大擺港女甫士，好有少女心。至於着住紅色襯衣加烈燄紅唇嘅半百壽星女Amanda都保養得宜，驟眼睇唔出快到25對了。