【獨家】準人妻同阿媽行超市　張寶兒大掃有機盒裝湯

呢期TVB最紅必屬袁偉豪同張寶兒，前者日前喺ig貼咗一段一年前向張寶兒求婚嘅片段，求婚詳情唔再講嘞，講足咁多日相信大家都識背。而帶住4,000萬嫁妝準備嫁袁偉豪嘅準人妻日前就同阿媽去行超市，就嚟做人老婆嘅Bowie主力逗留喺食物區，揀咗有機湯又有黑蒜同埋果醬，全部放得落口，咁鍾意買嘢食，睇嚟袁偉豪都好有口福喎。採訪:梁志明

39歲袁偉豪與28歲張寶兒拍拖三年，日前在社交平台公佈喜訊，將會拉埋天窗。張寶兒有個富爸爸，有朵「底褲大王」都知唔嘢少，張父早於去年五月已「預支」4,000萬嫁妝，畀囡囡及未來女婿作首期買入6,568.3萬元清水灣傲瀧超豪愛巢。未來老婆又叻又靚又有錢，難怪袁偉豪狂讚Bowie：「佢係我嘅幸運女神！」明㗎嘞。

未來袁太幾Sharp
當晚8點，戴咗口罩，着得好簡單嘅張寶兒同媽媽去咗銅鑼灣時代廣場超市行街，兩母女一開始一齊行，然後分開行，分開行期間Bowie就係咁睇嘢食，唔係零食唔係鮮食，係一盒盒嘅有機盒裝雞湯及蔬菜湯，每盒盛惠45蚊，之後再睇可提高免疫力又可改善睡眠質素同改善便秘嘅獨子黑蒜，最後拎多樽果醬，揀完再會合阿媽一齊走。