【独家】准人妻同阿妈行超市　张宝儿大扫有机盒装汤

呢期TVB最红必属袁伟豪同张宝儿，前者日前喺ig贴咗一段一年前向张宝儿求婚嘅片段，求婚详情唔再讲嘞，讲足咁多日相信大家都识背。而带住4,000万嫁妆准备嫁袁伟豪嘅准人妻日前就同阿妈去行超市，就嚟做人老婆嘅Bowie主力逗留喺食物区，拣咗有机汤又有黑蒜同埋果酱，全部放得落口，咁锺意买嘢食，睇嚟袁伟豪都好有口福喎。采访:梁志明

39岁袁伟豪与28岁张宝儿拍拖三年，日前在社交平台公布喜讯，将会拉埋天窗。张宝儿有个富爸爸，有朵「底裤大王」都知唔嘢少，张父早于去年五月已「预支」4,000万嫁妆，畀囡囡及未来女婿作首期买入6,568.3万元清水湾傲泷超豪爱巢。未来老婆又叻又靓又有钱，难怪袁伟豪狂赞Bowie：「佢系我嘅幸运女神！」明㗎嘞。

未来袁太几Sharp
当晚8点，戴咗口罩，着得好简单嘅张宝儿同妈妈去咗铜锣湾时代广场超市行街，两母女一开始一齐行，然后分开行，分开行期间Bowie就系咁睇嘢食，唔系零食唔系鲜食，系一盒盒嘅有机盒装鸡汤及蔬菜汤，每盒盛惠45蚊，之后再睇可提高免疫力又可改善睡眠质素同改善便秘嘅独子黑蒜，最后拎多樽果酱，拣完再会合阿妈一齐走。