【獨家】兩公婆買咗5支清酒 黎耀祥強調純入貨非開P

雖然近日疫情緩和，但專家都話盡量減少社交活動，社交距離亦要Keep住。日前見到三屆視帝黎耀祥拖住老婆去咗圓方行街，兩公婆路過一間酒舖望兩望即入，然後買咗5支清酒離開，《頭條日報》記者問視帝係咪開P?視帝秒答「入貨啫」。 採訪:李維隆

黎耀祥之前跟TVB改簽部頭合約，逐步減產享受家庭生活。黎氏夫婦一向鍾情日本，鍾意去日本旅行，又鍾意食日本嘢，因為新冠肺炎影響，邊度都唔去得，可能因為咁，家中清酒存貨量激減，所以見到啱就入多幾支。

唔知楊明咩事
當日下午，黎氏夫婦去咗Vivienne Tam買衫，買完就行去停車場放低啲衫之後再繼續行街，兩公婆路經一間酒舖就即入，兩人主力睇清酒，平至400蚊貴至4000蚊都睇，見有貴客光臨，店員都好好招呼，兩公婆加一個店員傾咗好耐，最後視帝祥買咗5支清酒，每支盛惠700蚊。一出門口，黎耀祥就發現記者，先揮揮手打招呼，問祥仔買咁多酒係咪開P?佢諗都冇諗即刻答:「飲晒，入定貨啫。」再問有無留意楊明涉醉駕嘅新聞，為免講多錯多，祥仔即以唔知同唔清楚作回應。