【独家】两公婆买咗5支清酒 黎耀祥强调纯入货非开P

虽然近日疫情缓和，但专家都话尽量减少社交活动，社交距离亦要Keep住。日前见到三届视帝黎耀祥拖住老婆去咗圆方行街，两公婆路过一间酒铺望两望即入，然后买咗5支清酒离开，《头条日报》记者问视帝系咪开P?视帝秒答「入货啫」。 采访:李维隆

黎耀祥之前跟TVB改签部头合约，逐步减产享受家庭生活。黎氏夫妇一向锺情日本，锺意去日本旅行，又锺意食日本嘢，因为新冠肺炎影响，边度都唔去得，可能因为咁，家中清酒存货量激减，所以见到啱就入多几支。

唔知杨明咩事
当日下午，黎氏夫妇去咗Vivienne Tam买衫，买完就行去停车场放低啲衫之后再继续行街，两公婆路经一间酒铺就即入，两人主力睇清酒，平至400蚊贵至4000蚊都睇，见有贵客光临，店员都好好招呼，两公婆加一个店员倾咗好耐，最后视帝祥买咗5支清酒，每支盛惠700蚊。一出门口，黎耀祥就发现记者，先挥挥手打招呼，问祥仔买咁多酒系咪开P?佢谂都冇谂即刻答:「饮晒，入定货啫。」再问有无留意杨明涉醉驾嘅新闻，为免讲多错多，祥仔即以唔知同唔清楚作回应。