星島日報

心儀歌曲被楊千嬅捷足先登 周慧敏寧願演唱會冇主題曲

2020-09-14 09:00
周慧敏和伍仲衡接受主持許文軒訪問。
周慧敏和伍仲衡接受主持許文軒訪問。

J2《我們的音樂時代》最後一集,主持許文軒(Edmond)邀請周慧敏(Vivian)及音樂人伍仲衡(Harry)成為壓軸嘉賓,二人大談相識到合作無間的關係,伍仲衡說:「早在中學時期已為周慧敏鋼琴伴奏《天荒愛未老》,可惜當時未有合照,好彩上天對我不薄,畀我識到Vivian。」周慧敏說:「本身2006年啱啱識Harry,我好多年冇做騷,諗住造隻新歌,不過一定要最鍾意,最啱心水先至會錄,當時Harry的確寫咗首歌畀我,經過一輪考慮,到我話畀佢知我要首歌時,首歌已經賣咗,最後首歌變咗楊千嬅嘅《原來過得很快樂》,既然遇唔到一首自己好鍾意嘅歌就不如唔出,所以嗰次就冇新歌做騷。」

談到二人默契十足,周慧敏說:「我同Harry比較夾,準則都好相近,所以大家唔使拗。直到2011年開演唱會我哋先第一次合作,佢寫咗首《無雙譜》畀我,其實我對旋律好腌尖,但一聽個Demo已經好鍾意,好感動,佢嘅作品最令我毛管戙,到佢再寫《咖啡在等一個人》畀我,我亦一聽就滴咗眼淚。」伍仲衡說:「畀Vivian聽Demo,佢冇感覺嗰啲係唔會覆,即刻覆我嗰啲Demo,真係好鍾意,《無雙譜》佢唔夠2分鐘即刻回覆我Email。」

節目中伍仲衡更談及王菀之(Ivana),原來二人交情亦非淺,Harry說:「Ivana未做歌手之前,幫我唱咗好多Demo,大概十幾二十首,佢喺加拿大讀書,每年暑假返嚟香港都會幫我錄,我就幫佢造Demo,佢就幫我唱Demo。另外我仲叫佢參加CASH流行曲創作大賽,當時佢喺加拿大,我仲幫佢冒簽名填Form報名,大家都入咗圍,最後佢攞冠軍,我攞亞軍(你輸咗畀佢有冇啲後悔幫佢冒簽名?)係喎!早知唔同佢交Form。」

周慧敏和伍仲衡接受主持許文軒訪問。
周慧敏和伍仲衡接受主持許文軒訪問。
06年,周慧敏在紅館舉行了3場《Back For Love演唱會》,因找不到心儀歌曲,演唱會並沒有新歌做主題曲。
06年,周慧敏在紅館舉行了3場《Back For Love演唱會》,因找不到心儀歌曲,演唱會並沒有新歌做主題曲。

周慧敏心儀伍仲衡所作的歌,後來變成了楊千嬅的《原來過得很快樂》。
周慧敏心儀伍仲衡所作的歌,後來變成了楊千嬅的《原來過得很快樂》。
原來當年王菀之參加「CASH流行曲創作大賽」的報名表,由伍仲衡冒其簽名代交。
原來當年王菀之參加「CASH流行曲創作大賽」的報名表,由伍仲衡冒其簽名代交。

最新回應

關鍵字

相關新聞

熱門文章