休團只為找回做音樂初心 Kendy澄清同Robynn絕對冇不和

Robynn&Kendy的Kendy Suen（孫曉賢）日前作客TVB娛樂新聞台節目《StarTalk》，接受主播許文軒（Edmond）專訪，大談單飛推出新歌《如斯》感受。Robynn&Kendy於3月宣布休團，專訪中Kendy被Edmond問到二人是否不和時，Kendy澄清：「絕對唔係不和！我哋一齊9年，一來同唱片公司滿約，二來我哋喺人生階段嘅時間表節奏上開始有所不同，三來好想搵返造音樂嘅初心，所以休團呢件事都糾結咗一輪，傾咗好耐。我哋都好珍惜呢9年嘅時間，有好多回憶、情感、經驗、得着同作品，我哋有傾過唔排除10周年會重組，但𠵱家想畀個空間各自做自己鍾意做嘅音樂。」



談到新作《如斯》屬於「療癒自己」的歌曲，Kendy說：「因為喺舊公司Robynn&Kendy有兩年時間工作停滯咗，冇乜出產，Send咗好多Demo畀公司都揀唔啱，嗰段時間有啲Depress，個狀態好辛苦，唔知造歌係追緊啲乜，有種營商嘅感覺，搞到好氣餒！其實我覺得自己唔係好適合喺呢個狀態裏面，以前好彩有Robynn，我哋會互補平衡返，𠵱家想搵返個舒服嘅狀態去創作。」