【古天后日誌】內銀股業績齊上齊落十年來最差

8月31日，部份時間有陽光，局部地區有驟雨及雷暴，天氣炎熱，酷熱天氣警告正生效。話咁快8月已嚟到最後一日，咁快又過O左一年，去年今日發生乜嘢事，大家應該唔會忘記，亦唔應該忘記。上周五期指結算，今日開始trade9月份期指，下周一恒指成份股執位，阿里巴巴(09988)及小米(01810)兩隻新經濟股將加入，預期此後指數將變得更為波動，呢一點大家要留意。 不過上周五美股繼續做好，標指跟納指再創收市新高，預期今日港股亦會跟隨高開，但暫時未見有乜嘢利好消息可以帶動大市進一步向上突破，估計喺下周恒指成份股變動前，港股都係以上落市為主。而上周五日本首相因為健康理由請辭，令日經指收急挫逾600點，不過有消息指央行將維持政策立場不變，日經指數今早大幅反彈近500點，收復上周五大部份失地。 美國限制美企需於9月份內完成有關與TikTok交易，若TikTok未能售予美國企業，將完全封殺TikTok。中國一直以嚟對於美國封殺或制裁中國科企都只以打嘴炮回應，但今次字節跳動出售TikTok海外業務，中國表示根據中國新實施嘅人工智能技術出口限制規定，字節跳動將需要取得中國政府批准才能出售TikTok，有關TikTok嘅交易，相信難以一帆風順。美國將如何對應，古天后無口晶球難以預測，要關注有關事件發展，對中科企嘅影響。 四大內地國有銀行喺噚日齊齊派上半年成績表，喺減少收費及降低信貸利率，為實體經濟「讓利」下，銀行業盈利甚為失色，四大國有銀行上半年少賺超過一成，呢個純利跌幅係十年以嚟最勁。四大內銀合共賺2140.48億元人民幣(下同)，較去年同期的2864.77億元勁挫兩成半，各行資產質素呈現急速惡化，不良貸款率及餘額均「雙升」，壞帳水平甚令市場擔憂。一向四大內銀嘅業績都係齊上齊落，盈利表現十足餅印一樣，睇完一份內銀股業績，已經知道其他內銀股業績表現，呢O的可以話係內地經濟嘅特色。由於內銀股佔恒指比重都有一定份量，今日內銀股肯定抽住大市後腿。 偏偏唔少缸邊友，尤其係股齡較長嘅股民，手上都持持內銀股，除O左係經歷過2007年內銀金融股瘋狂大升，即使近幾年內銀股表現不濟，仍然唔捨得放心，甚至有股民更見內銀股息率高，而不斷加碼溝貨。可惜內銀股不單止喺今年未見起色，大市升勢及成交更進一步傾斜至科技股及新經濟股跟輕資產股等，更令呢班老股民喊得一句句。 其實古天后經常強調，要喺股票市場長期作戰，除O左要裝備好自己勤做功課外，與時並進跟不時調節心態相當重要，好似一向被視為穩穩陣陣，老來退休作收息之選嘅大笨象(00005)，又點會預計到今年唔派息要食白果。當然新經濟股今年以嚟累積升幅甚巨，估值已唔算平，但恒指未來加入更多新經濟股已成趨勢，若然手上組合仍未有ATM呢三大過萬億市值嘅科技巨頭，不妨考慮下藍籌新貴小米，目前仍只得5600億市值左右，預期市盈率亦不足40倍，即使近日股價急升，但相對ATM其餘三大巨頭，小米相對仍有較大上升空間。至於回流港股上市嘅京東(09618)跟網易(09999)同對係未來藍染股熱門之選，只不過始終喺美股上市，受限美股嗰嘅表現，阿里巴巴一直落後於騰訊(00700)及美團(03690)亦係呢個原因。 古天后 (徐狄怡，證監會持牌人)