【獨家】54歲少女Look Shopping 不老溫碧霞嘟嘴試唇膏

54歲嘅溫碧霞(Irene)的確好勁，雖然5字頭，但身形Keep得好好，五官都冇乜走樣，最難得係「不老Irene」樂此不疲幾十年都係嗰個少女風嘅着衫風格，露膊低胸加飄逸仙女Feel嘅吊帶裙，幾十年如一日。日前下午，難得着牛仔Boot，仙氣減少，多咗型仔味嘅「不老Irene」去ifc買唇膏，試搽期間佢仲試到嘟晒嘴，真係好Cute呀。採訪:張詠森

溫碧霞現身處上海，佢話因為接咗好多Job所以都要逗留當地一一段時間，預計10月中先返香港。佢報平安話喺上海好安全，仲去咗上海迪士尼樂園玩咗一日，買咗T恤、文具及玩具畀個仔Xavier做手信兼生日禮物。

用手搽唇膏
當日，梳住中間分界長髮，着Tube Dress及牛仔Boot嘅「不老Irene」去咗ifc行街，見佢漫無目的四圍行，然後入咗一間化妝品舖頭睇唇膏，望咗一陣已有心水，然後佢就叫店員拎咗一支鮮紅色嘅唇膏畀佢試，見佢搽完再用手修飾唇邊，咦，隻手未搽搓手液就直接掂個嘴，唔係幾衛生喎。搽完照吓鏡，「不老Irene」好滿意效果更不自覺嘟嘴，嗰種自信真係隔住兩個舖位都Feel得到。