遭網友嘲牛扒慢煮25個鐘　黃宗澤大廚出馬家中展廚藝

身為餐廳老闆的黃宗澤（Bosco）出名廚藝高超，不時在家中親自下廚宴請老友，好似龔嘉欣、「三哥」苗僑偉、舊愛胡杏兒等食過都激讚好味！由於新冠肺炎疫情關係，政府早前勒令食肆禁止晚市堂食，最近忙拍新劇《飛虎3壯志英雄》的Bosco，日前趁唔使開工就喺屋企煮番兩味，兼Po上IG呃Like。他先貼出一張手拎血淋淋生牛扒的自拍，並懶得戚地預告：「睇吓我今晚點炮製你啦！」結果等咗一日，Bosco終於再喺IG晒靚扒相展示成果，同場加映仲有一碗西湯，望落拍得住米芝蓮餐廳嘅水準，他寫道：「泡製完成。慢煮3個鐘，再加多個豆乳馬鈴薯濃湯！」好友吳千語即留言投訴：「有得睇冇得食。」而一班網民就揶揄Bosco：「一煮就係一日」、「慢煮了25個小時吧？」