【鍾意哨牙仔咁得意】被嫌唔夠靚仔 江𤒹生奪沈殷怡熒幕初吻

Mirror成員江𤒹生（AK）第二首派台作品《蝸牛》MV，請來ViuTV節目《美女郊遊遊》的沈殷怡（Shirley）當女主角。此曲以AK的愛情故事作藍本，表達男人對於戀事後知後覺，喻珍惜身邊人。
Shirley在MV中演AK女友，畫面穿插著二人恩愛及Shirley孤單一人作對比，AK就是飾演那後知後覺的男友，後悔得要流下男兒淚。問AK當中可有任何劇情是個人經歷？他即說：「病唔喺身邊未試過，除非要出去做嘢，否則都會陪女朋友，另外試過同以前女朋友一齊煮嘢食。」
至於找來Shirley參與演出，AK表示全靠友情搭夠，二人相識接近10年，在他加入Mirror後大家同公司，實在有緣。其實Shirley更為了AK於MV中獻出熒幕初吻。她說：「AK好Gentleman，佢都會事先問可唔可以錫臉，或者錫其他地方，大家都係想個MV好睇，有最大嘅效果，所以最後即使親密鏡頭有啲尷尬都覺得唔緊要，觀眾覺得好睇就OK了。」被問到AK可是她的理想男友類型？Shirley笑說：「我鍾意白白淨淨高大哨牙，AK笑咗我十幾年，話邊有人鍾意人哨牙㗎，叫我唔好搞笑，但我呢個癖好到依家都戒唔到。佢成日都問我佢靚唔靚仔，以我嘅標準，有啲進步空間囉！」