【新冠肺炎】屬冇病徵感染者鄧達智出院與伴侶歎榴槤慶祝

2020-08-05 11:30

62歲時裝設計師鄧達智(William)上月24號確診新冠肺炎，在家中隔離等足4日，延至7月28日才被安排白車送入聯合醫院接受治療，在醫院住了7天，昨晚7時許終於由伴侶陳梓欣醫生（Clement）接載返到元朗住所，落車後即遞手機給記者要求為二人影合照，然後接受訪問。而他返家後第一時間和陳醫生撐枱腳開餐，嘆紅酒、榴槤及日本蜜瓜慶祝，陳醫生還準備了美味嘅汕頭滷水鵝及鵝肝，可惜剛康復嘅William冇乜胃口，只係食咗少少榴槤。

鄧達智好開心不用再留院，又笑言雖然已有抗體，沒有病毒，可以拿掉口罩，但不想引起公眾恐慌，返家後會繼續隔離一星期，在家工作，以釋除別人疑慮，因病和陳醫生分隔逾兩星期，現時會互相照顧，由對方煮飯，又讚對方廚藝不錯。

鄧達智講返過去幾日的經歷：「治療期間打針後不斷發燒發冷，嚴重副作用燒足4天變得好迷糊，退燒後3日即可出院，都算好快。醫生話我係冇病徵感染，冇肺炎冇咳，除咗發燒之外，正常唔會知道自己有問題，所以有責任要更加小心，一定要去驗，唔好等到有病徵先去做驗測。」他估計自己因為當日在網台除口罩做訪問出事，因為兩日後訪問他的人都確診。